“Mi Bae March Raonem Altar Bilong Iu, O Jehovah”

“MI BAE wasim hand bilong mi for showimaot mi no guilty, and mi bae march raonem altar bilong iu, O Jehovah.” (Psalms 26:6) King David bifor talem toktok hia for showimaot wei wea hem lovem Jehovah. Bat, why nao hem “march raonem” altar bilong Jehovah, and long wanem wei?

For David, main part long worship bilong Jehovah hem tabernacle wea olketa iusim copper for kavarem altar bilong hem for sakrifaes, wea long taem wea hem rul, hem stap long Gibeon, long north saed bilong Jerusalem. (1 Kings 3:4) Datfala altar hem samting olsem 2.2 meter square nomoa, hem smol winim nambawan altar wea olketa buildim insaed courtyard long temple bilong Solomon bihaen.a Nomata olsem, David hapi tumas long datfala tabernacle witim altar bilong hem, wea hem main ples bilong klin worship long Israel.—Psalm 26:8.

Olketa burnim offering, communion sakrifaes, and guilt offering long datfala altar, and tu olketa Atonement Day sakrifaes for datfala nation wea kamap evri year. Datfala altar and olketa sakrifaes bilong hem garem mining for olketa Christian distaem. Aposol Paul sei datfala altar hem stand for will bilong God, wea Hem acceptim sakrifaes wea fitim for baem bak olketa man. Paul sei: “Thru long datfala ‘will’ iumi kamap holy from offering bilong body bilong Jesus Christ wanfala taem for olowe.”—Hebrews 10:5-10.

Taem olketa redy for waka long datfala altar, olketa priest savve wasim hand bilong olketa long wata for klinim olketa seleva. Dastawe hem fitim for King David wasim hand bilong hem “from wei for no guilty” bifor hem ‘wakabaot raonem datfala altar.’ Hem duim samting “witim faithful fasin bilong heart and witim stretfala fasin.” (1 Kings 9:4) Sapos hem no wasim hand bilong hem olsem, God bae no acceptim worship bilong hem—wei wea hem ‘wakabaot raonem datfala altar.’ Tru, David hem no wanfala Levite and hem no garem privilege for duim waka bilong priest long datfala altar. Nomata hem king, hem no fit for go insaed long courtyard bilong datfala tabernacle tu. Nomata olsem, olsem wanfala faithful Israelite, hem obeyim Law Bilong Moses and evritaem tekem kam offering bilong hem for sakrifaesim long altar. Hem wakabaot raonem datfala altar long wei wea main samting long laef bilong hem nao klin worship.

Waswe, iumi distaem savve followim example bilong David? Yes. Iumi tu savve wasim hand bilong iumi from wei for no guilty and march raonem altar bilong God sapos iumi showimaot faith long sakrifaes bilong Jesus and, ‘garem hand wea no guilty and heart wea klin,’ for servem Jehovah witim full heart.—Psalm 24:4.

[Footnote]

[Piksa long page 23]

Altar hem piksarem will bilong Jehovah, wea hem acceptim stretfala sakrifaes for baem bak olketa man