Hu Nao Bae Finisim Raf Fasin?

LONG September 1999, Secretary-General bilong UN, Kofi Annan, hem welkamim olketa bigman wea kam long datfala mek-54 meeting bilong General Assembly wea savve kamap evri year. Olsem The Toronto Star hem reportim, hem challengem olketa leader bilong world taem hem sei: “Staka pipol tumas stap wea needim moa samting from world community winim wei for tok sorre nomoa. Olketa needim trufala promis for help finisim raf fasin wea kasem olketa, and startim olketa long road for go kasem gudfala living.”

Waswe, UN witim olketa member nation bilong hem savve givim datfala “trufala promis” wea olketa needim for finisim raf fasin? Datfala sem Star report talem toktok bilong President bilong U.S., Bill Clinton, wea sei: “Bihaen long wei for spillim blood long disfala century, iumi savve hem isi for sei ‘hem bae no happen moa,’ bat hem hard tumas for duim.” Hem sei moa: “For promisim tumas samting hem nogud samting olsem wei for kea lelebet nomoa.”

Winim 2,500 year bifor, profet Jeremiah sei olsem abaotem hard waka bilong man: “Mi savve, O Jehovah, wei bilong man hem no bilong hem. Hem no bilong man wea wakabaot for disaedem gogo bilong hem.” (Jeremiah 10:23) So, wanem hope nao stap for finisim raf fasin?

Olsem iumi readim long Isaiah 60:18, God givim disfala promis: “Bae raf fasin no stap moa long land bilong iu, wei for barava spoelem or brekdaon insaed long area bilong iu.” Datfala profesi hem firstaem fulfill taem God aotem pipol bilong hem wea olsem prisoner go bak long homland bilong olketa. Hem bae fulfill tu long bigfala wei moa wea iumi savve enjoyim. Jehovah God hem no “promisim tumas samting.” Olsem Most Hae and Creator bilong evriwan, hem stap long nambawan position for finisim “raf fasin.” Anda long Kingdom bilong God, peace bae win. Raf fasin bae finis olowe!—Daniel 2:44.