Why Nao Forgivim Narawan?

OLKETA scientist duim research wea start for showimaot hao wei for forgive hem help long feeling—and, maet long, physical—health,” The Toronto Star bilong Canada hem reportim. Nomata olsem, Professor Carl Thoresen bilong Stanford University, U.S.A., wea leadim research for datfala Stanford Forgiveness Project, hem sei “no staka pipol minim wanem nao forgiveness and hao hem waka.”

Pipol ting tru forgiveness hem wanfala important part bilong Christian wei. The Toronto Star report minim diswan olsem “wei for luksavve nara man duim rong samting long iu, lusim feeling for kros wea kamaot from diswan, and gogo iu story witim man wea duim rong samting witim fasin for kea and love.” Mas luksavve hao diswan hem difren from wei for saedem, for excuse, forget, or for denyim wanfala rong; and hem no minim for spoelem iuseleva tu. Datfala report hem sei key long tru forgiveness hem for “lusim kros and nogud feeling.”

Olketa man for research sei pipol need for studyim moa hao forgiveness hem savve helpem man long physical wei. Nomata olsem, olketa reportim help wea diswan savve duim long mind, insaed diswan hem wei for “no garem tumas hevi, wari and sorre feeling.”

Ephesians 4:32 talemaot wanfala nambawan reason for forgive, wea sei: “Kamap kaen long narawan, garem fasin for kea, willing for forgivim narawan olsem God tu thru long Christ hem willing for forgivim iufala.” Long saed bilong forgiveness, olsem long nara samting, iumi kasem encouragement for copyim God.—Ephesians 5:1.

For no willing for forgivim nara pipol taem faondeson for showimaot mercy hem stap savve affectim wei wea iumi fren witim God. Jehovah expectim iumi for forgivim narawan. Then iumi savve prea for hem forgivim iumi.—Matthew 6:14; Mark 11:25; 1 John 4:11.