Olketa Gudfala Waka Givim Glory Long God
OLKETA wea lovem God trae hard for showimaot spiritual laet from Word bilong hem, Bible. Long disfala wei, olketa followim komand bilong Jesus: “Letem laet bilong iufala shaen front long olketa man, mekem olketa savve lukim olketa gudfala waka bilong iufala and givim glory long Dadi bilong iufala wea stap long heven.” (Matthew 5:16) Toktok bilong iumi and stretfala fasin savve givim glory long God.
Olketa Jehovah’s Witness trae for mekem God hapi taem olketa followim Bible and taem olketa trae hard for helpem narafala pipol long spiritual wei. Olketa duim diswan nomata long olketa land wea pablik ministry bilong olketa no register yet for fitim law. Long kapitol taon bilong wanfala long olketa kantri hia, olketa Witness holem finis olketa convention wea savve kamap evri year wea samting olsem 6,000 go kasem 9,000 pipol attendim. Olketa savve rentim olketa hall long wanfala ples wea olketa pablik show savve happen long hem. Olsem olketa duim bifor convention bilong olketa long 1999, planti handred Witness waka hard for klinim datfala ples and putim saond system and staka thousand chair.
Pipol lukim disfala wei for prepare. Olketa bigman bilong disfala ples lukim evri samting hia wea olketa duim. Olketa lukim tu hao nomata 15,666 pipol nao attend, evriting hem go ahed gud and olketa Witness barava followim order. Olketa bigman hia sapraes tumas long wei wea olketa barava klin ap bihaen.
Olketa showimaot olketa hapi long evri samting hia taem olketa putim Olketa Witness for stap first long list mekem olketa nao bae garem first chance for rentim disfala building long year bihaen. Bat olketa duim moa samting. For showimaot wei for tinghae, long July 15, 1999, olketa givim wanfala award long datfala convention komiti. Olketa raetem disfala toktok “Kongregeson bilong olketa Jehovah’s Witness” long datfala award—samting wea iumi no expectim long wanfala kantri wea olketa tambuim Bible education waka bilong olketa.
Evriwea long world long 2000/2001, olketa expectim staka million pipol for attendim planti handred “Pipol wea Duim Word Bilong God” Distrik Convention bilong Olketa Jehovah’s Witness. Sapos iu long there, iu savve lukim hao olketa wea duim samting wea Bible talem duim gudfala waka wea givim glory long God.