Report Bilong Olketa wea Talemaot Kingdom

Olketa wea Lovem Jehovah Kamap Spesol Samting Long Hem

START kam long taem bilong Bible, Lebanon hem wanfala ples wea garem planti natural resource. (Psalm 72:16; Isaiah 60:13) Olketa bigfala cedar tree nao wanfala wea nambawan, wea pipol barava aftarem for iusim for building from hem luk naes, smel naes, and savve stap longtaem. Long first century, samting wea moa spesol nao kamaot from Lebanon. Gospel bilong Mark talem hao from Tyre and Sidon, long area bilong Lebanon bifor, “wanfala bigfala sekson, taem olketa herem olketa samting [Jesus] duim, olketa kam long hem.”—Mark 3:8.

Olsem tu distaem, Lebanon go ahed for garem frut wea barava spesol long eye bilong Jehovah. Olketa experience long hia showimaot diswan.

• Wanfala young Witness nem bilong hem Wissam, garem chance for givim wanfala 30-minute tok long class bilong hem long skul. Wissam tingim hao diswan bae gud taem for hem givim witness. So hem iusim disfala buk Life—How Did It Get Here? By Evolution or by Creation? and hem preparem tok wea storyim creation. Bat, taem teacher bilong Wissam lukim information bilong hem, teacher hia sei from hem important subject, Wissam savve mekem tok bilong hem kasem 45 minute.

Taem Wissam startim tok bilong hem, teacher stopem hem and go talem principal for kam. No longtaem principal arrive, and Wissam start moa. Principal lisin long olketa kwestin wea Wissam talem insaed introduction bilong tok, and diswan mekem principal for interest and hem sei evri student shud garem fotocopy bilong disfala tok.

Lelebet taem bihaen nara teacher moa, wea wakabaot go pas, lukim hao evriwan interest long wanfala samting so hem ask wanem nao go ahed. Taem olketa talem hem samting wea happen, hem ask sapos Wissam trae for pruvim creation or evolution. Ansa wea kam bak sei, “Creation.” Bihaen hem savve Wissam hem wanfala Jehovah’s Witness, disfala teacher sei long class: “Bae iufala herem long tok bilong hem hao science saportim creation, no evolution.”

Disfala teacher garem finis wanfala copy bilong Creation buk and hem iusim for teach long university! Bifor hem go, hem ask sapos hem savve kam bak long next day witim olketa student bilong hem mekem Wissam savve givim tok long olketa. Nara nambawan witness long Jehovah kamap moa.

• Nina wea hem 22 year, thirsty for wata bilong truth. Wanday wanfala kasin bilong hem givim hem wanfala Bible and tekem hem go long Pentecostal Church. Nina hapi for readim Bible and lanem from reading bilong hem hao olketa Christian mas preach, so hem start for story long olketa fren bilong hem. Evriwan wea hem story long olketa askem hem: “Iu wanfala Jehovah’s Witness?” Diswan mekem hem konfius.

Sixfala year bihaen, olketa Jehovah’s Witness kasem haos bilong Nina and talem hem abaotem Kingdom bilong God. Firstaem Nina trae for faendem rong witim teaching bilong olketa. Bat, hem lukim hao evri ansa bilong olketa hem stret and kam from Bible.

Samting wea Nina lanem—nem bilong God, Jehovah; olketa blessing bilong Kingdom; and samfala samting moa—helpem hem for luksavve hao hem faendem truth. Hem dedicatem laef bilong hem long God and hem baptaes. Long sevenfala year wea go pas, Nina go ahed olsem wanfala wea preach full taem. Tru nao, Jehovah blessim olketa wea garem trufala love for hem.—1 Corinthians 2:9.