‘Olketa Tok Abaotem Gud Fasin and Love’

LONG olketa year wea just go pas, Olketa Jehovah’s Witness long France kamap main target bilong wanfala strong campaign for tokspoelem olketa. Olketa enemy iusim toktok wea no tru and laea information for talem giaman samting abaotem olketa long pablik. Long start bilong 1999, Olketa Jehovah’s Witness evriwea long France givimaot 12 million copy bilong tract wea garem title Pipol Bilong France, Olketa Giaman Long Iufala! Insaed tract hia, olketa tok againstim olketa giaman story wea olketa talem againstim olketa.

Tu-thri day bihaen long datfala campaign, Mr. Jean Bonhomme, wanfala medical doctor and member bilong Parliament bifor, sendem wanfala leta for evriwan long wanfala lokol niuspepa. Hem raet olsem: “Olketa Jehovah’s Witness savve kam long haos bilong mi samfala taem. Olketa kam for tok long mi abaotem gudfala fasin and wei for showimaot love long evriwan. . . . Olketa no forcem olketa seleva long man. Olketa talemaot tingting bilong olketa long hambol wei and lisin long kaenfala wei taem mi talemaot daot bilong mi.”

Taem hem story abaotem tingting bilong Olketa Jehovah’s Witness long spiritual samting, Mr. Bonhomme sei: “Eni samting abaot olketa wea no followim wei bilong world, no savve spoelem eniwan. Long narasaed, wei wea samfala man bilong politik no followim wei bilong world hem barava putim peace and wan mind bilong pipol long danger.”