Earth Ples for Test Nomoa?
GUD TUMAS! Hem pasim nao. Datfala student wea go thru tufala hard week bilong exam kasem nao report wea mekem hem hapi. Hem savve duim nao waka wea hem wantem evritaem.
Planti pipol ting olsem abaotem laef long earth. Olketa tingim olsem firstfala test wea evriwan mas feisim. Olketa wea “pasim” savve muv go long laef bihaen wea moabeta. Tru nao, hem sorre samting sapos laef distaem—wei for stap nomoa for planti pipol—hem best samting olketa man expectim. Nomata hem healthy and garem gudfala living for klosap full laef bilong hem, datfala man long Bible, Job, hem sei: “Man, wea born from woman, garem shortfala laef and fulap witim trabol.”—Job 14:1.
New Catholic Encyclopedia talem disfala toktok wea showimaot tingting bilong planti pipol: “Glory long heven nao ples wea God minim for pipol kasem. . . . Hapi bilong man depend long biliv bilong hem long hapi laef long heven.” Wanfala survey wea Church of Christ long United States duim hem sei 87 percent long olketa wea ansa biliv olketa bae go long heven bihaen olketa dae.
Planti wea no Christian tu hope for lusim disfala earth for go long ples wea moabeta bihaen olketa dae. Olsem example, olketa Muslim hope for go long wanfala paradaes long heven. Olketa follower bilong Pure Land sect bilong Buddhist religion long China and Japan biliv hao taem olketa go ahed for talem evritaem “Amitabha” prea, wea hem nem bilong datfala Buddha bilong Unlimited Light, bae olketa born moa long Pure Land, or Western Paradise, ples wea olketa bae barava stap hapi.
Interesting samting, Bible, holy buk wea olketa transleitim and givimaot evriwea long world, nating talem earth olsem ples for ranawe from, olsem ples for go pas long hem. Olsem example, hem sei: “Olketa raeteous wan seleva bae kasem earth, and olketa bae stap olowe long hem.” (Psalm 37:29) Insaed Bible tu iumi faendem toktok bilong Jesus wea planti pipol savve long hem: “Hapi nao olketa wea garem kwaet fasin, from olketa bae kasem earth.”—Matthew 5:5, King James Version.
Disfala tingting wea sei pipol stap long earth for lelebet taem nomoa hem mekem tingting kamap hao dae nao hem door for kasem wanfala hapi laef bihaen. Sapos olsem, then dae hem wanfala blessing. Bat, waswe, diswan nao tingting bilong planti pipol abaotem dae, or olketa trae for mekem disfala laef long go moa? Experience showimaot hao taem pipol enjoyim gudfala health and sef living, olketa no want for dae.
Nomata olsem, from laef long earth hem fulap witim nogud samting and wei for safa, planti pipol still ting long heven olsem ples for faendem trufala peace and hapi. Waswe, heven hem wanfala ples bilong peace nomoa, wea free evribit from nogud samting and wei for no garem wan mind? And, waswe, long heven nomoa wanfala laef bihaen bae kamap? Maet iu bae sapraes long olketa ansa bilong Bible. Plis read go moa.