“Example Bilong Wan Mind”

HEM nao title bilong article wea olketa pablisim long wanfala niuspepa long Indaiatuba, São Paulo, Brazil. Hu nao showimaot disfala example? Man wea raetem minim olsem: “Olketa Jehovah’s Witness, wea plan for buildim wanfala niu ‘Kingdom Hall,’ wea hem nem olketa iusim for temple or auditorium bilong olketa, wea givim trufala and really example bilong wan mind wea iumi kanduit ting nating long hem.”

Wan mind midolwan long Olketa Jehovah’s Witness hem showaot long olketa taem olsem. Dastawe datfala article talem: “Hem muvim man taem hem lukim olketa man, woman, and teenager volunteer willing for waka tugeta for buildim wanfala ples wea olketa savve hipap tugeta and worshipim God.”

Olketa Jehovah’s Witness showimaot gudfala example long nara samting tu. Disfala article talem moa: “Winim wei for study and prea nomoa, goal bilong olketa hem for helpem olketa wea depend long drink and drug for gud bak and for showimaot long pipol wei bilong wan mind and love.” Hao nao olketa fit for duim diswan? Olketa Witness savve hao wei for lanem and followim Bible kaonsel savve helpem man for ranawe from olketa fasin olsem. Dastawe olketa trae hard for teachim narawan wanem olketa seleva lanem finis from Bible. Datfala article sei moa long end bilong hem: “Example [bilong olketa] hem wanfala wea, iumi no daotem, iumi need for followim distaem.”

Olketa meeting bilong Olketa Jehovah’s Witness open long pablik and no eniwan askem donation. Mifala laek for invaetem iu for kam visitim wanfala Kingdom Hall wea klosap long iu.