Peace Long World Hao?
WASWE, world peace hem klosap for kam? Bifor planti ting olsem bat distaem olketa daotem. Olsem wanfala report wea story abaotem olketa challenge for future bilong iumi talem, wea olketa pablisim insaed Daily Mail & Guardian bilong South Africa, “future bilong wanfala niu international order wea olketa mekem 10 year bifor distaem luk olsem hem no garem hope.”
Olketa man wea raetem diswan ting raonem feeling bilong hope wea stap tenfala year bifor. Cold War hem just finis, and faet bilong olketa strong nation nomoa nao. Long wanem luk olsem hem start bilong wanfala taem bilong niu samting, planti pipol expectim hao olketa man bae start for winim poor living, sik, and olketa problem saed long environment. “Olketa tingting hia kamap olsem tingting wea no barava garem hope,” datfala report hem sei. “Olketa niufala faet brek aot long olketa area wea iumi nating savve gud long olketa; poor living long world hem go ahed for kamap big. Tufala niufala nuclear paoa stap. Wei wea hem no givim inaf help long olketa trabol bilong olketa man long samfala ples hem spoelem nem bilong UN. Tingting hia change from wei for tingim nambawan ples go for tingim wanfala nogud ples.”
Olketa student bilong Bible luksavve hao olketa waka bilong man, nomata hao gud nao diswan, no savve win. Why nao olsem? Bikos, olsem Bible talem, “full world hem stap long paoa bilong wicked wan.” (1 John 5:19) Taem disfala world hem stap anda long kontrol bilong Satan, hem hard for kamap Paradaes olsem hem purpose bilong God firstaem.
Long semtaem, reason stap for tingim gud saed. Jehovah God promis for bringim peace long world, no long wei for stretem disfala system, bat long wei for bringim kam wanfala “niu earth . . . wea raeteous fasin bae stap.” (2 Peter 3:13) Yes, thru long Kingdom bilong God, earth bilong iumi bae kamap wanfala peaceful, hapi hom, wea laef and waka bae kamap hapi samting evritaem for evri man wea obey. And tu, God hem promis for “aotem evri wata from eye bilong olketa, and dae bae nomoa, sorre and krae and pain bae nomoa tu.” Olketa promis hia no kam from olketa man wea iumi no savve trustim. Nomoa, bat hem kam from trufala Word bilong Creator, wea no savve laea.—Revelation 21:4; Titus 1:2.