For Luk Naes Insaed Bae Stap Olowe

“WANFALA YOUNG MAN TINGIM WEI FOR LUK NAES HEM SEMSEM WITIM GUDFALA FASIN,” WANFALA FAITHFUL OLO CHRISTIAN SEI.

Yes, longtaem nao man mekhae long wei for luk naes aotsaed, and planti taem diswan lead go long wei for judgem insaed fasin long rongfala wei. Bat, Creator bilong iumi lukluk long wanem kaen man nao iumi insaed, nomata wanem nao lukluk bilong iumi aotsaed. Long disfala wei hem showimaot best example long wei for judge long mature wei. Olsem Bible talem, God seleva sei: “God no lukim samting olsem man hem lukim samting, from man hem lukim samting wea eye nomoa lukim; bat Jehovah, hem lukim heart.”—1 Samuel 16:7.

Wei wea olketa man luk naes hem kam from God, and Word bilong hem showimaot hao taem iumi lukluk gud long olketa fasin wea man fit for kasem praise long hem, olketa spiritual fasin nao hem barava important. Bible hem sei: “Swit toktok maet giaman, and for luk naes maet hem samting nating; bat woman wea fraet long Jehovah nao hem fit for kasem praise.” (Proverbs 31:30) Wei for luk naes aotsaed hem savve haedem wei wea man hem luk nogud insaed. (Esther 1:10-12; Proverbs 11:22) Nomata gogo wei for luk naes long physical wei savve finis, wei for luk naes insaed—olketa barava gud fasin bilong heart—savve grow and stap olowe.

Dastawe, hem wise for mekem grow olketa fasin olsem love, hapi, peace, patient for safa, kaenfala fasin, gud fasin, faith, kwaet fasin, fasin for kontrolem seleva! (Galatians 5:22, 23) So iumi savve kasem wei for luk naes insaed, wea hem garem barava hae price.—1 Peter 3:3, 4.