Wan Mind Long Religion Klosap?
“Iumi lukim wanfala important day long history bilong olketa church bilong iumi,” Christian Krause, president bilong Lutheran World Federation hem sei. Olsem tu, Pope John Paul II story abaotem “wanfala barava important taem for buildimap moa wan mind midolwan olketa Christian.”
Samting wea muvim olketa for talemaot diswan hem wei wea olketa saenem wanfala Toktok long October 31, 1999, long Augsburg, Germany, wea strongim datfala Agreement Abaotem Teaching Bilong Justification. Olketa chusim gudfala taem and ples for diswan kamap long hem. Olketa sei hao long October 31, 1517, Martin Luther hem nilam 95-fala raeting bilong hem long door bilong church haos long Wittenberg, and there nao hem startim datfala Protestant Religion. Bat long Augsburg nao olketa Lutheran long 1530 showimaot main biliv bilong olketa, datfala Augsburg Confession, wea Catholic Church rejectim, and wea lead go long wei for no agree midolwan Protestant and Catholic religion.
Waswe, datfala Agreement bae kamap wanfala step for winim wei wea olketa church divaed, olsem olketa talem? No evriwan long olketa tingim gud saed. Winim 250 savveman bilong Protestant religion saenem wanfala pepa for showaot wei wea olketa no agree, and talem warning againstim wei wea Catholic Church maet tekova long olketa. Olketa Protestant feel kros tu taem Catholic Church talemaot wanfala wei for kamap free from sin for year 2000, samting wea kosim wei for divaed long samting olsem 500 year bifor. And from Augsburg Confession and wei wea Catholic Church disaed for againstim long Council bilong Trent still stap, hem hard tumas for kasem wan mind.
Datfala wei for divaed and for no agree midolwan Christendom hem big tumas wea wei for saenem eni agreement no savve stretem. And tu, wei for garem wan mind long faith hem depend long olketa biliv wea garem faondeson long Word bilong God, Bible. (Ephesians 4:3-6) Wan mind no depend long wei for letem wan saed win, trufala wan mind hem kam from wei for lanem and duim wanem God hem askem iumi for duim. “From evri pipol, for saed bilong olketa, bae wakabaot long nem bilong god bilong olketa,” faithful profet Micah hem sei, “bat iumi, for saed bilong iumi, bae wakabaot long nem bilong Jehovah, God bilong iumi go kasem longfala taem, yes for olowe.”—Micah 4:5.
[Piksa Credit Line long page 32]
© Ralph Orlowski/REUTERS/Archive Photos