“Samting wea Shud Mekem Evriwan Hapi”
TUVALU, kantri long South Pacific wea luk naes tumas, hem garem naenfala island and samting olsem 10,500 pipol. Nomata olsem, from Olketa Jehovah’s Witness long there luksavve “will bilong [God] nao for evri difren kaen man mas sev and kasem stretfala savve bilong truth,” olketa barava want for garem olketa Bible pablikeson long languis bilong olketa seleva. (1 Timothy 2:4) Diswan mekem challenge kamap bikos no eni dictionary stap long datfala languis. Long 1979, wanfala missionary bilong Olketa Jehovah’s Witness wea serve long Tuvalu acceptim datfala challenge. Hem and waef bilong hem stap witim wanfala famili, lanem datfala languis, and hem isisi mekem list long olketa word bilong Tuvaluan languis. Long 1984, Watchtower Bible and Tract Society of New York, Inc. pablisim datfala buk You Savvy Stop All-the-way long Paradise long Earth long Tuvaluan languis.
Dr. T. Puapua, wea prime minister long Tuvalu bifor, raetem wanfala leta for talemaot wei wea hem tinghae long datfala Live Forever buk. Hem raet: “Disfala buk hem narafala niu and barava important samting for join witim olketa ‘riches’ bilong Tuvalu. Iufala mas barava hapi witim part wea iufala duim—wanfala nambawan part for buildimap spiritual laef bilong pipol bilong disfala nation. Mi biliv strong hao disfala buk wea iufala wakem bae olketa raetem insaed history bilong Tuvalu saed long wei for printim olketa buk bilong education. . . . Disfala [nambawan waka] hem samting wea shud mekem evriwan hapi.”
List bilong olketa word wea datfala translator wakem, hem lead go long wei for pablisim wanfala Tuvaluan-English dictionary long 1993. Hem firstfala dictionary long datfala languis for pablik iusim. No longtaem go nomoa, datfala National Language Board bilong Tuvalu ask for iusim diswan for wakem firstfala dictionary long languis bilong olketa.
Start kam from January 1, 1989, olketa pablisim Wastaoa magasin evri month long Tuvaluan languis. Sapos iu readim disfala magasin long mek-tu languis bilong iu, lukim page 2 and chekim sapos firstfala languis bilong iu hem wanfala long olketa languis wea olketa pablisim Wastaoa long hem. For readim long firstfala languis bilong iu bae givim iu bigfala hapi moa.