Peace for Niu Millennium?
OLKETA openem International Year for Mekem Peace Grow, long Paris and New York City long September 14, 1999. General Assembly bilong United Nations nao announcem diswan for year 2000. Federico Mayor, director general bifor bilong UNESCO, barava ask “for world waka tugeta for mekem peace grow and stopem raf fasin.”
UNESCO garem biliv hao “from olketa war start insaed mind bilong man, insaed mind bilong man nao wei for kasem peace mas grow.” For join witim diswan, datfala organization plan for mekem peace grow thru long “education, wei for sharem idea and waka tugeta.” Mr. Mayor sei hem no inaf for man “laekem peace, nomata for heitim raf fasin, bat hem mas mekem peace grow.”
Sorre tumas, datfala year 2000 hem nating garem peace. History bilong distaem—and tu olketa samting wea happen insaed datfala year 2000—showaot klia wei wea man no fit for stopem war and raf fasin nomata olketa trae hard.
Bat, wei wea peace hem join witim education hem important. Samting olsem 2,700 year bifor, profet Isaiah profesi olsem: “Olketa son bilong iu bae kamap pipol wea Jehovah teachim, and peace bilong olketa son bilong iu bae kamap big.” (Isaiah 54:13) Disfala sem profet lukim wanfala taem wea pipol bilong evri nation bae go ap long klin worship bilong Jehovah God for lanem olketa wei bilong Hem. Wanem nao kamaot from diswan? “Olketa mas hammerim sword bilong olketa for kamap hou and spia bilong olketa for kamap naef for katem tree. Nation bae no iusim sword againstim narafala nation, and olketa bae no lanem war moa.” (Isaiah 2:2-4) For fitim disfala profesi, Olketa Jehovah’s Witness duim wanfala education waka evriwea long world wea helpem finis planti million pipol for lusim feeling for mekhae long kantri and heitim difren tribe wea kosim staka war.
Bae gogo no eni war moa andanit Kingdom bilong God, wea bae tekem kam peace and sef living long earth for olowe. (Psalm 72:7; Daniel 2:44) Then, toktok bilong man wea raetem psalm bae fulfill: “Lukim olketa waka bilong Jehovah, wei wea hem duim olketa samting wea mekem man sapraes long earth. Hem finisim olketa war go kasem evriwea long earth.”—Psalm 46:8, 9.