Hao Olketa Win Taem Narawan Pullim Olketa

FEELING for wantem pipol for acceptim man hem pullim planti for followim tingting and akson bilong fren bilong olketa. Young pipol nao main wan wea needim strong for againstim olketa fasin wea savve spoelem man, olsem wei for iusim drug and dirty fasin. Hao nao olketa savve win taem narawan pullim olketa?

No longtaem go nomoa tufala teenage girl long Poland raet olsem: “Spirit bilong world hem showaot klia midolwan planti wea mifala sem age. Olketa raverave long skul exam, iusim dirty toktok, and laekem tumas stael kaleko and wild, nogud music. Mifala barava hapi for garem olketa article wea olketa raetem for mifala olketa young wan wea protectim mifala from fasin bilong olketa teenager wea no savve satisfae and bighed!

“No eni toktok savve talemaot thankiu bilong mifala for olketa Wastaoa article wea showimaot klia hao pipol needim and tinghae long mifala olsem young pipol. Olketa Bible kaonsel wea mifala kasem helpem mifala for leadim gogo bilong mifala long stretfala wei mekem mifala go ahed for mekem Jehovah God hapi. Mifala barava biliv strong hao for servem Jehovah long faithful wei hem nao best wei long laef.”

Tru nao, young pipol savve win taem narawan pullim olketa. Taem olketa trainim “paoa bilong olketa for luksavve,” olketa young Christian lane for mekem olketa wise disison wea no showimaot “spirit bilong world” bat, “spirit wea kam from God.”—Hebrews 5:14; 1 Corinthians 2:12.