Laef Garem Danger
“Evri samting iumi duim long laef evriday—sleep insaed diswan tu—garem samfala chance for danger for laef bilong iumi.”—Discover magasin.
SAMFALA markem laef witim wei for wakabaot long area wea olketa bomb haed long graon, bikos kill or dae savve kasem man enitaem, planti taem no eni warning tu. Samting wea kosim danger hem difren long olketa difren kantri. Insaed diswan hem accident long trak, war midolwan long kantri, bigfala hangre, AIDS, cancer, sik long heart, and planti nara samting. Olsem example, U.S.News & World Report hem talem hao long sub-Saharan Africa, AIDS hem main samting wea killim dae man, long wanfala year wea just pas hem “tekem laef bilong 2.2 million pipol, diswan hem 10 taem moa big winim namba wea dae from evri war insaed Africa.”
Long semtaem, world spendem bigfala selen for mekem laef moa long and for daonem chance for sik and disable. Planti gudfala samting savve kamaot from olketa idea wea olketa talem, olsem wei for balance saed long kaikai and drink and exercise. Bat, information stap wea iumi fit for trustim abaotem evri important part long laef wea savve helpem iumi enjoyim laef wea moa sef. Hem stap long Bible. Hem ga-
rem olketa gaedlaen for deal witim staka problem wea affectim health and living bilong iumi. Hem tru, Bible no deal witim evri information long evri kaen problem. Bat, hem provaedem olketa nambawan principle for gaedem iumi long samting olsem wei for kaikai, exercise, wei for tingting, saed long sex, wei for iusim alcohol, tobacco, and olketa drug wea pipol sei hem for hapitaem nomoa, and staka nara samting.
Laef bilong planti hem fulap tu witim olketa wari saed long selen. Long diswan tu, Bible savve helpem iumi. Hem encouragem iumi for garem wisefala tingting abaotem selen and hao for iusim long gudfala wei and tu hao for kamap wanfala beta wakman or boss. For tok stret, Bible hem wanfala gudfala gaed, no for saed long selen and physical samting nomoa, bat for laef. Waswe, iu laek for lukim hao Bible barava fitim distaem? Sapos olsem, plis read go moa.