Iu Savve Really Hapi?
GEORGE hem smile taem hem sei hello long pipol. Long hem, laef hem wanfala spesol present for enjoyim. Evriwan savve long hem olsem man wea hapi and tingim gud saed—nomata taem hem start for olo tu. Go kasem day hem dae, pipol savve long hem olsem wanfala hapi man. Waswe, iu hapi olsem George? Iu ting long each niu day olsem wanfala present for enjoyim? Or iu no interest or maet lelebet fraet taem iu tingim wanfala niu day? Eniting hem stopem iu for hapi?
Olketa minim hapi olsem wei for stap gud for lelebet longfala taem. Insaed diswan, hem feeling olsem wei for satisfae, hapi wea barava deep, and for wantem diskaen feeling for no finis. Waswe, iumi savve kasem hapi olsem?
Distaem, world hem mekhae long idea wea sei pipol bae hapi only sapos olketa kamap rich. Planti million pipol garem barava busy living from olketa stragol hard for kamap rich. Taem olketa duim olsem, planti lusim wei wea olketa fren witim narawan and olketa nara important samting long laef. Olsem ants long graon, olketa evritaem muv raon and no garem inaf taem for ting raonem samting or for spendem witim narawan. Iumi savve minim hao, olsem wanfala report insaed Los Angeles Times talem, “namba bilong pipol wea garem sorre wea no savve finis hem go ahed for kamap moa big, and age bilong olketa wea diswan hem affectim hem go ahed for go daon. . . . Olketa company for wakem medicine sellim moa medicine for treatim sorre feeling wea no savve finis winim eni nara medicine.” Planti million iusim olketa drug wea law tambuim or alcohol for mekem olketa trae daonem problem bilong olketa. Taem samfala garem sorre feeling olsem, olketa laek for baem staka samting. Long wanfala study, British niuspepa The Guardian hem sei, “winim olketa man, olketa woman nao main wan for go long olketa stoa for mekem olketa feel gud taem olketa garem sorre feeling. Wei for go long stoa taem man garem sorre feeling hem thri taem moa big long olketa woman.”
Bat, man no savve faendem trufala hapi long stoa, long alcohol, medicine, drug, or selen long bank. Iu no savve baem wei for hapi, hem free. Wea nao iumi savve faendem spesol present olsem? Iumi bae storyim diswan long next article.