Bae Religion Bringim World Peace?
FROM August 28 go kasem August 31, 2000, winim 500 man from 73 kantri meet long New York City. Olketa meet tugeta long United Nations for “Datfala Millennium World Peace Summit Bilong Olketa Spiritual Leader and Olketa Leader Bilong Religion.” Olketa leader hia—planti werem olketa turban, orange color kaleko, olketa feather long hed, or longfala blak kaleko—stand for staka difren religion. Samfala long olketa bilong Baha’i, Buddhist, Hindu, Islam, Jain, Jew, Shinto, Sikh, Tao, Zoroastrian, and olketa religion bilong Christendom.
Olketa meet long United Nations for first tufala day bilong datfala meeting wea go ahed for fofala day. Bat, United Nations no organizem or peim kost bilong datfala meeting, samfala nara organization nao duim. Nomata olsem, olketa leader bilong UN and bilong religion talem hao hem important for waka tugeta for finisim poor living, fasin for heitim man from difren ples, olketa problem long environment, war, and olketa samting for faet wea fit for finisim evri kaen laef.
Olketa wea attendim disfala meeting saenem wanfala pepa wea garem title “Promis for Peace Evriwea Long World.” Nomata hem talemaot hao raf fasin and war “samfala taem start long nem bilong religion,” datfala pepa talem hao olketa wea saenem bae “waka tugeta witim United Nations . . . for aftarem peace.” Bat, hem no talemaot klia eni plan for kasem datfala goal.
Long mek-tu day, taem hem finisim introduction bilong hem, Bawa Jain, secretary-general bilong datfala summit, explainim hao samfala year bifor hem lukim wanfala piksa long United Nations. Insaed datfala piksa hem wanfala man wea tol winim datfala United Nations Secretariat building. Hem noknok long datfala building olsem hem wanfala door. Anda long datfala piksa hem garem toktok wei sei: “Prince Bilong Peace.” Mr. Jain sei: “[Datfala piksa] affectim mi long bigfala wei long barava semtaem wea mi lukim. Mi askem samfala difren pipol wanem nao mining bilong [hem]. Distaem mi ting mi garem ansa. Wei wea iufala evriwan hipap long hia, olketa spiritual leader and olketa leader bilong religion long world, showimaot long mi hao [diswan] hem datfala prince bilong peace wea noknok long door bilong United Nations.”
Bible givim difren idea long diswan. Hem showim hao Prince Bilong Peace hem Jesus Christ. Hem bae bringim peace evriwea long world, no thru long waka bilong olketa leader bilong politik or olketa leader bilong religion bilong disfala world, bat thru long Kingdom bilong God. Hem nao disfala Kingdom—gavman bilong God long heven—wea bae win for mekem olketa man garem wan mind and bae duim will bilong God long earth.—Isaiah 9:6; Matthew 6:9, 10.