Report Bilong Olketa wea Talemaot Kingdom
Nem Bilong God Kamap Free From Blame
WORD bilong God, Bible, hem sei: “Keepim fasin bilong iufala gud midolwan long olketa nation, mekem, long samting wea olketa tok againstim iufala olsem nogud pipol, olketa savve lukim gudfala waka bilong iufala and givim glory long God long day for hem duim inspection.” (1 Peter 2:12) Dastawe olketa tru Christian trae for keepim gudfala fasin, mekem no eni blame kam long nem bilong Jehovah.
Long wanfala farawe area bilong Zambia wea olketa kolem Senanga, samwan stealim radio from haos bilong wanfala skul teacher. From Olketa Jehovah’s Witness preach long datfala area, datfala teacher accusim olketa for steal. Hem reportim long police, and sei olketa Witness stealim radio bilong hem. For pruvim hao olketa Witness kam long haos bilong hem, hem showim wanfala tract wea hem faendem long floor. Nomata olsem, police nating bilivim hem. Olketa givim advaes for hem go and lukluk moa long disfala problem.
Body of elders encouragem olketa Witness wea preach long area bilong teacher long datfala day for go storyim disfala problem witim hem. Samfala brata go and story witim hem, and minim hao olketa want for mekem nem bilong Jehovah kamap free from blame. Long story bilong olketa, olketa talem hao olketa meetim wanfala young man long haos bilong hem and givim wanfala tract long hem. From samting olketa talem, disfala teacher savve hu nao man hia. Tru nao, tufala attendim sem church. Datfala teacher story witim datfala young man, bat hem denyim. Datfala teacher storyim diswan witim parents bilong datfala young man and then hem go bak long haos. Insaed long wanfala hour, mami bilong datfala young man tekem kam bak radio.
From hem feel sorre, datfala teacher kam long body of elders and askem olketa for forgivim giaman samting wea hem accusim olketa. Olketa elder acceptim wei wea hem tok sorre bat askem tru story for kamap pablik mekem evriwan savve olketa Witness no guilty. Wanfala announcement kamap long skul, and long wei olsem mekem nem bilong Jehovah kamap free from blame. Olketa Jehovah’s Witness savve free for go ahed preach long datfala area.
[Map/Piksa long page 19]
AFRICA
Zambia
[Credit Line]
Mountain High Maps® Copyright © 1997 Digital Wisdom, Inc.