Bible Study Hem Gud for Iu?

“MAS no readim sapos wanfala priest hem no long there.” Disfala warning hem stap long start bilong samfala Bible bilong olketa Catholic. Kay Murdy bilong Catholic Bible Institute long Los Angeles hem sei: “For longtaem, mifala olsem olketa Catholic no savve gud long Bible, bat datwan hem change.” Hem sei, taem olketa Catholic luksavve hao olketa Holy Scripture savve helpem olketa long laef, “olketa start for barava laekem Bible.”

Abaotem disfala change, datfala magasin U.S. Catholic hem talem toktok bilong wanfala bigman bilong education bilong religion wea sei olketa Catholic wea joinim olketa Bible study class feelim hao “olketa no kasem gud samting olsem olketa Catholic, and hao staka rich spiritual samting stap insaed Bible. Olketa want for kasem samfala long olketa rich samting hia wea olketa feel olsem olketa missim.”

Bat, wanem kaen “rich samting” nao stap for wanfala student bilong Bible for faendemaot? Tingim: Waswe, iu laek for savve long hao for deal witim olketa wari bilong evriday living? Hao nao iu savve keepim peace insaed famili? Why nao fasin wea no showimaot respect and wei for againstim community hem big tumas? Wanem nao kosim raf fasin midolwan olketa young pipol distaem? Iumi savve faendem ansa for olketa kwestin hia and samfala nara kwestin moa wea man fit for trustim insaed Word bilong God, Bible, and olketa bae kamap “rich samting,” tru nao, no for olketa Catholic or Protestant nomoa bat for olketa Buddhist, Hindu, Muslim, Shintoist, and nomata pipol wea no biliv long God, and pipol wea no sure sapos God hem stap. Olsem man wea raetem Psalm hem sei, ‘Word bilong God hem wanfala lamp for leg bilong hem, and laet for road bilong hem.’ Hem savve kamap olsem long iu tu.—Psalm 119:105.