“Waswe, God Really Judgem Pipol for Bone Long Hell?”
“Waswe, iu skulim religion?”
Disfala kwestin mekem Joel and Carl sapraes. Tufala young man hia—wea serve olsem volunteer long headquarters bilong Olketa Jehovah’s Witness long Brooklyn, New York—lukluk long olketa buk long wanfala bukstoa klosap. Taem Joel lukluk gud insaed olketa Bible concordance, Carl storyim hapi samting wea hem kasem long ministry. Wanfala man wea standap klosap herem samfala part long story hia so hem kam long tufala.
Bat interest bilong datfala man hem no long wei wea tufala young man hia skulim religion. Hem sei: “Mi wanfala Jew, and samfala Christian fren bilong mi talem hao mi bae bone long hell bikos olketa Jew rejectim Jesus. Diswan mekem mi wari tumas. For wanfala loving God panisim man long diskaen wei luk olsem hem no followim justice. Waswe, God really judgem pipol for bone long hell?”
Joel and Carl talem disfala honest man hao tufala barava student bilong Bible. Tufala showim hem from Bible hao olketa wea dae finis no savve long eni samting and sleep long dae and weitim resurrection. So, olketa no safa or kasem eni pain long hellfire. (Psalm 146:3, 4; Ecclesiastes 9:5, 10; Daniel 12:13; John 11:11-14, 23-26) Bihaen olketa story for 45 minute, datfala man givim address bilong hem long Joel and Carl and ask for moa information long disfala subject.
Sapos hell hem wanfala ples bilong fire for givim pain, waswe, eniwan savve ask for go long there? Bat, Job, from hem laek ranawe from pain bilong hem, ask olsem: “Hu nao bae givim mi diswan, mekem iu protectim mi insaed hell, and haedem mi go kasem taem kros bilong iu go pas?” (Job 14:13, Douay Version) Hem klia, Job no biliv hao hell hem ples bilong pain. Bat, hem lukaotem protection long there. Taem man hem dae hem no stap laef long eni ples, and datfala hell long Bible hem minim grev bilong olketa man.
Sapos iu laekem moa information abaotem wanem nao happen long iumi taem iumi dae and wanem hope nao hem stap bihaen datwan, mifala hapi for invaetem iu for acceptim offer long daon.