Olketa Iusim Nem Bilong God Long Central Africa

BIG haf long pipol bilong Central Africa biliv long God. Olketa no daotem wei wea hem nao Creator bilong evri samting. (Revelation 4:11) Bat, olsem staka pipol evriwea, planti taem olketa ting nating long nem bilong God—Jehovah.

Pipol long Central Africa, and olketa nara part bilong world, talem nem bilong God insaed Lord’s Prea taem olketa sei, “Hallowed be thy name.” (Matthew 6:9, King James Version) Nomata olsem, for longtaem nao samfala nomoa savve long datfala nem. Bat, insaed olketa year wea go pas, strongfala preaching waka bilong Olketa Jehovah’s Witness hem changem tingting bilong pipol abaotem wei for iusim nem bilong God. Distaem, pipol savve and acceptim nem bilong God long staka languis bilong Africa, olsem Zulu (uJehova), Yoruba (Jehofah), Xhosa (uYehova) and Swahili (Yehova). Nomata olsem, staka Bible transleison long olketa languis hia still no iusim nem bilong God.

Wanfala gud transleison wea iusim nem bilong God hem Bible long Zande languis, wanfala languis wea olketa iusim long samfala part bilong Central African Republic, Sudan, and Democratic Republic of Congo. Pipol iusim nem bilong God long olketa kantri hia, wea long languis bilong olketa hem Yekova. Nomata nem bilong God maet difren for difren languis, important samting hem for iusim. Why? Bikos “evriwan wea singaot long nem bilong Jehovah bae sev.”—Romans 10:13.

[Map/Piksa long page 32]

SUDAN

CENTRAL AFRICAN REPUBLIC

DEMOCRATIC REPUBLIC OF CONGO

[Credit Line]

The Complete Encyclopedia of Illustration/J. G. Heck