Wanfala Leson From Palm Tree

“WANFALA spesol samting wea barava luk naes.” Hem nao hao wanfala Bible encyclopedia hem storyim date palm. Long taem bilong Bible and distaem tu, olketa date palm mekem Nile Valley bilong Egypt luk naes tumas, and hem givim shade long samfala area long Negev Desert.

Olsem planti difren kaen palm tree, date palm hem grow stret ap. Samfala kasem 30.5 meter hae and go ahed for garem frut for 150 year. Tru nao, date palm hem barava luk naes long eye and hem savve garem staka frut tumas. Evri year hem savve garem staka bunch bilong date frut. Wanfala bunch nomoa savve garem winim 1,000 date frut. Wanfala bigman raet olsem abaotem olketa date frut: “Olketa wea . . . savve long date frut from olketa drae wan nomoa wea olketa tekem from stoa, hard for savve long really swit bilong fresh wan.

Long wei wea fitim, Bible markem samfala man olsem olketa palm tree. For mekem God hapi, olsem wanfala palm tree wea garem staka frut, man mas garem stretfala fasin and mas go ahed for garem olketa gudfala waka. (Matthew 7:17-20) Dastawe, olketa iusim olketa piksa bilong palm tree for decoratem temple bilong Solomon and temple long vision bilong Ezekiel. (1 Kings 6:29, 32, 35; Ezekiel 40:14-16, 20, 22) So, for God acceptim worship bilong man, hem mas garem olketa naesfala wei olsem date palm. Word bilong God hem explainim: “Raeteous wan seleva bae grow gud tumas olsem wanfala palm tree.”—Psalm 92:12.