“Day for Storyim Difren Religion”
FROM hem interest long wanfala story bilong Olketa Jehovah’s Witness, headmistress bilong wanfala skul long Poland markem wanfala “Day for Storyim Olketa Difren Religion” for skul bilong hem. Hem askem olketa student for volunteer—Olketa Catholic, Buddhist, and Jehovah’s Witness—for redyim wanfala short story for talem olketa nara student abaotem biliv and samting wea olketa duim. Thrifala teenage Witness bilong Jehovah volunteer stretawe.
Taem hem kasem datfala day, first wan for story hem Malwina wea 15 year. Part long story bilong hem olsem: “Planti long iufala savve long mifala bifor mifala kam long disfala skul from iufala lukim mifala kam long haos bilong iufala. Iufala maet tingting why nao mifala duim diswan olowe. Hem from mifala followim example bilong Jesus, Man wea Startim Christian Wei. Hem preachim gud nius bilong Kingdom bilong God long eni ples wea pipol stap. Olketa aposol and olketa narafala first Christian duim sem samting tu. Long planti ples, Olketa Jehovah’s Witness mas go ahed strong nomata olketa kasem hardfala test long faith, bat mifala hapi hao long skul bilong iumi mifala garem peace, wea iufala evriwan share for mekem kamap. Mifala sei thankiu for datwan!”
For finisim story bilong hem, Malwina sei: “Narafala reason stap why mifala savve kam long haos bilong iufala. Hem from mifala kea abaotem iufala. Bible sei hao klosap nao olketa man bae kasem olketa samting wea bae sekem disfala world. So next taem mifala noknok long door bilong iufala, plis tek-taem for lisin. Mifala laek for talem iufala abaot hao iumi savve stap tugeta for olowe insaed wanfala paradaes long earth.”
Next speaker hem Mateusz, wea hem 15 year tu. Mateusz talem audience hao for planti year, Olketa Jehovah’s Witness bin iusim staka difren kaen wei for sharem disfala gud nius. Olsem example, long 1914—taem olketa movie no garem saond yet—olketa Witness showim datfala “Photo-Drama of Creation,” wanfala movie and slide presentation wea garem saond.
Mateusz storyim hao olketa iusim radio for sharem Kingdom message and then hem explainim spesol computer program (MEPS), wea Olketa Jehovah’s Witness wakem for mekem olketa buk and magasin long staka languis. Hem talem tu hao Olketa Jehovah’s Witness help for talem olketa doctor abaotem wei for givim treatment wea no garem blood. Hem sei: “Distaem, olketa big doctor long Poland talem gud samting abaotem wei wea mifala no tekem blood and strongim tu hao moa and moa pipol wea sik and no Witness olketa kasem operation wea no iusim blood.”
Mateusz finisim story witim wei for talem olketa abaotem construction bilong olketa Kingdom Hall, hem sei: “Waswe, iufala laek kam visitim bilong mifala? For kam insaed hem free and no eni kolekson for selen.” Taem hem story abaotem convention center long Sosnowiec, Mateusz sei: “Hem barava gud sapos iufala savve lukim disfala bigfala building wea olketa planim long wei wea hem barava gud for iusim. Waswe sapos iumi go long there tugeta? Mifala garem wanfala idea, and fren bilong mifala Katarzyna bae talem iufala abaotem.”
Next wan for story hem, Katarzyna wea 15 year wea sei witim feeling for interest tumas: “Iufala barava welkam for kam long Sosnowiec for distrik convention bilong Olketa Jehovah’s Witness. Olketa bae storyim olketa topic wea affectim young pipol.” Katarzyna storyim tu main samting for olketa Christian celebratem—Memorial bilong dae bilong Jesus Christ. Hem encouragem olketa olsem: “Last year winim 14 million pipol evriwea long world attendim datfala celebration. Waswe sapos iu joinim mifala next taem?”
Bihaen thrifala hia story finis, Malwina, Mateusz, and Katarzyna givim long olketa teacher datfala buk Jehovah’s Witnesses—Proclaimers of God’s Kingdom witim tufala videocassette wea storyim olketa biliv and waka bilong Olketa Jehovah’s Witness.a Olketa teacher hapi for acceptim and promis for iusim long olketa history class.
Long end bilong datfala session Martyna wea 12 year hem pleim disfala song “O Thankiu Jehovah.” Olketa young Witness hia ‘kasholem fasin for no fraet thru long God bilong olketa’ and givim wanfala nambawan witness. (1 Thessalonians 2:2) Hem wanfala nambawan example for olketa young Witness evriwea!
[Footnote]
a Olketa Jehovah’s Witness nao pablisim.
[Piksa long page 26]
Malwina preparem story bilong hem tu-thri day bifor hem talem long skul
[Piksa long page 26]
Katarznya chusim olketa scripture for story bilong hem