Report Bilong Olketa wea Talemaot Kingdom
“Iu Ringim Rong Namba”
LONG Johannesburg, South Africa, Leslie and Caroline iusim telephone for witness long olketa wea stap long wanfala ples for olketa olo wea garem security gard. Olketa faendemaot hao tu-thri pipol nomoa stap and no staka interest long Christian message, so Caroline kasem encouragement taem wanfala woman hem ansa.
“Waswe, iu nao Mrs. B—?” Caroline hem ask.
“Nomoa,” hem sei witim kaenfala voice, “mi Mrs G—. Iu ringim rong namba.”
From woman hia garem voice wea showimaot naes feeling, Caroline sei: “Letem mi explainim samting wea mi want for talem long Mrs. B—.” So hem go ahed for tok abaotem olketa blessing bilong Kingdom bilong God wea bae kam. Bihaen hem mekem arrangement for go givim datfala brochure Wanem Nao God Mas Kasem From Iumi?, Mrs. G— ask olsem: “Wanfala samting moa, iu bilong wanem religion?”
“Mifala Olketa Jehovah’s Witness,” Caroline ansa.
“Oh no, no datfala religion! Ating mi no want for lukim iu.”
“Bat Mrs. G—,” Caroline sei moa, “insaed 20 minute wea go pas, mi sharem barava nambawan hope witim iu and showim from Bible wanem nao Kingdom bilong God bae klosap duim for olketa man. Iu hapi tumas for herem olketa samting hia and iu want for lanem moa samting. Wanem nao iu really savve abaotem Olketa Jehovah’s Witness? Sapos iu sik, waswe, iu bae go long wanfala mechanic? Hao nao sapos iu letem mi talem iu wanem nao Olketa Jehovah’s Witness bilivim?”
Hem stap kwaet for lelebet taem then hem ansa: “Mi ting iu stret. Hem moabeta for iu kam. Bat mi laekem iu for savve, iu bae nating changem religion bilong mi!”
“Mrs. G—, mi nating savve changem iu nomata mi want for duim,” Caroline ansa. “Jehovah nomoa savve duim datwan.”
Datfala visit for givim brochure hia go ahed gud, and Mrs. G— (Betty) agree for narafala visit. Taem Caroline go bak, Betty storyim hao hem talem olketa woman long tebol wea hem kaikai long hem hao hem story witim Olketa Jehovah’s Witness. “Hao nao iu duim olsem?” olketa askem. “Olketa nating biliv long Jesus!”
Caroline stretawe remindim Betty abaotem main point from lastfala story bilong tufala abaotem Kingdom bilong God.
“Hu nao bae kamap King?” Caroline ask.
“Jesus nao,” Betty ansa.
“Hem stret,” Caroline sei. Then hem go ahed for explainim hao Olketa Jehovah’s Witness bilivim hao Jesus hem Son bilong God, bat hem no semsem witim God olsem part bilong wanfala Trinity.—Mark 13:32; Luke 22:42; John 14:28.
Bihaen tu-thri visit moa, hem klia hao nomata Betty hem woman wea hapi evritaem, hem no garem gudfala health. Tru nao, hem garem cancer and hem fraet for dae. “Mi wish mi herem olketa samting hia samfala year bifor and garem faith olsem iu,” hem sei. Caroline comfortim hem taem hem showim hem olketa scripture wea storyim dae olsem deep sleep wea bihaen, man savve laef bak thru long resurrection. (John 11:11, 25) Diswan barava encouragem Betty, wea distaem hem go ahed for enjoyim wanfala Bible study. Health bilong hem wea no gud nomoa holem hem bak for attendim olketa meeting long Kingdom Hall.
Caroline sei: “Hem klia tumas long mi hao olketa angel nao leadim disfala waka. Hem wanfala mistek for ringim telephone namba bilong Betty and tingim, hem 89 year old!”—Revelation 14:6.