“Thru Long Laet wea Kam From Iu Mifala Savve Lukim Laet”

LAET hem samting wea iumi planti taem ting nating long hem go kasem taem paoa hem kat and iumi insaed darkness. Bat iumi hapi from iumi fit for trustim evribit “paoa station” bilong iumi long skae, hem nao sun. Sun nao mekem iumi fit for lukim samting, kaikai, breathe, and stap laef.

From laet hem important for laef, iumi shud no sapraes for readim long Genesis hao laet hem kamap long first day bilong creation. “God hem sei: ‘Laet hem mas kamap.’ Then laet hem kamap nao.” (Genesis 1:3) Olketa raeteous man olsem King David evritaem luksavve long Jehovah olsem wan wea givim laef and laet. David hem raet: “Iu nao man wea givim laef. Thru long laet wea kam from iu mifala savve lukim laet.”—Psalm 36:9.

Toktok bilong David garem really mining and tokpiksa mining. Encyclopædia Britannica hem sei: “Laet hem barava affectim wei for lukluk.” Hem sei moa: “Moa information kasem brain thru long eye winim eni nara part long body.” From staka long olketa samting iumi lanem hem depend long nambawan wei for lukluk—wea needim laet for waka gud—laet garem tokpiksa mining tu insaed olketa Scripture.

Dastawe Jesus talem olketa disaepol bilong hem: “Mi nao laet bilong world. Man wea followim mi bae no wakabaot insaed long darkness, bat bae kasem laet bilong laef.” (John 8:12) Disfala tokpiksa laet wea Jesus story abaotem hem datfala message bilong truth wea hem preachim, wea givim spiritual laet long mind and heart bilong olketa wea herem. Bihaen staka year bilong spiritual darkness, olketa disaepol bilong Jesus savve minim nao purpose bilong God for olketa man and datfala hope bilong Kingdom. Diswan nao barava “laet bilong laef,” from savve hia savve lead go long laef olowe. Taem hem prea long dadi bilong hem long heven, Jesus sei: “Diswan nao minim laef olowe, for olketa kasem savve long iu, only trufala God, and long datwan wea iu sendem kam, Jesus Christ.” (John 17:3) Iumi mas no enitaem ting nating long disfala spiritual laet!