Kwestin From Reader

Hao nao Christian waef savve balancem wei for loyal long God witim wei for stap anda long hasband bilong hem wea no biliv sapos hasband hia celebratem olketa holiday bilong religion?

Waef bae needim wisdom and gudfala tingting for duim diswan. Bae hem duim stret samting sapos hem trae for balancem tufala responsibility hia. Jesus givim disfala kaonsel taem semkaen samting happen: “Peim bak olketa samting bilong Caesar long Caesar, bat olketa samting bilong God long God.” (Matthew 22:21) Hem tru, Jesus storyim responsibility bilong man for gavman, wea gogo olketa Christian kasem kaonsel for stap anda long hem. (Romans 13:1) Bat, kaonsel bilong hem fitim tu wei wea waef balancem olketa responsibility bilong hem for God witim responsibility from Bible for stap anda long hasband bilong hem, nomata sapos hasband no biliv.

No eniwan wea savve long Bible bae denyim wei wea firstfala responsibility bilong wanfala Christian hem for Olmaeti God, for loyal long hem evritaem. (Acts 5:29) Nomata olsem, staka taem wanfala tru worshiper savve mekwe for samting wea man wea no biliv wea garem paoa hem laekem, and long semtaem no brekem olketa haefala law bilong God.

Thrifala Hebrew wea Daniel chapter 3 storyim showim gudfala example for iumi. Bigman long gavman bilong olketa, Nebuchadnezzar, givim law for olketa and samfala narawan for mas go long level ples bilong Dura. From olketa luksavve diswan hem for duim false worship, thrifala Hebrew hia laek for missim diswan. Maet Daniel savve missim, bat thrifala hia nomoa nao.a So olketa obey for attend, bat olketa nating share long datfala rong samting.—Daniel 3:1-18.

Long sem wei, long taem bilong holiday, hasband wea no biliv maet ask or talem Christian waef for duim samting wea waef laek tumas for missim. Tingim samfala example: Hasband talem waef for kukim wankaen kaikai long day wea hem and olketa nara pipol bae celebratem datfala holiday. Or hem talem waef hao famili bilong hem (waef tu) bae visitim olketa relative bilong hem long datfala day for kaikai tugeta or visit nomoa. Or nomata bifor datfala holiday, hem maet sei hao taem waef go shopping, hem mas baem samfala samting for hem—kaikai for disfala celebration, or pepa and card for olketa present.

Long hia tu, Christian waef mas disaed strong for no share long olketa false wei bilong religion, bat waswe long samting hasband askem? Hem hed bilong famili, and Word bilong God hem sei: “Iufala waef, stap anda long hasband bilong iufala, olsem hem fitim iufala for duim long Lord.” (Colossians 3:18) Long olketa taem hia, waswe, hem savve stap anda long hasband and semtaem stap loyal long God? Hem mas disaed hao for balancem wei for obeyim hasband bilong hem witim first responsibility bilong hem for obeyim Jehovah.

Long olketa narataem wea no holiday, hasband maet askem hem for kukim wankaen kaikai, maet diswan favorite bilong hem or bikos hem getius for kaikaim kaikai hia long datfala taem. Waef hia bae laek for showimaot wei wea hem lovem hasband and hao hasband nao hed bilong hem. Waswe, waef savve duim diswan nomata sapos hasband askem for hem duim long taem bilong holiday? Conscience bilong samfala Christian waef letem olketa for duim diswan, from olketa ting long hem olsem wei for kuki evriday nomoa. Tru nao, olketa loyal Christian bae no putim eni holiday mining long diswan, nomata sapos hasband duim. Olsem tu, hasband maet laekem waef for go witim hem taem hem visitim olketa relative long olketa difren taem bilong month or year. Waswe, hem savve duim olsem sapos diswan hem long day bilong wanfala holiday? Or waswe, hem savve evritaem baem olketa samting hasband laekem taem hem go shopping and no tingim wanem hasband bae duim witim olketa samting hia bihaen?

Wanfala Christian waef shud tingim nara pipol—hao diswan bae affectim olketa. (Philippians 2:4) Hem bae no laek for mekem pipol ting hem join insaed datfala holiday, long sem wei wea olketa thrifala Hebrew no laekem pipol lukim olketa gogo long Dura. So maet long gudfala wei, hem trae for story gud witim hasband for faendaot sapos maet, from hem tingim feeling bilong waef bilong hem, datfala hasband savve duim seleva olketa samting hia wea join witim olketa holiday for helpem waef bilong hem wea lovem and respectim hem. Maet hem luksavve hao hem wise for no putim hem and waef bilong hem long ples wea savve mekem tufala shame from waef bae no join insaed worship bilong giaman religion. Yes, wei for story gud firstaem maet lead go long wei for stretem problem long peace.—Proverbs 22:3.

Tru nao, wanfala faithful Christian mas tingim evri saed and then disaed wanem for duim. Olsem thrifala Hebrew, wei for obeyim God mas first samting. (1 Corinthians 10:31) Bat witim diswan, olketa Christian wanwan mas disaed wanem samting hem savve duim wea no brekem loyal fasin bilong hem taem datwan wea garem paoa insaed famili or community askem hem for duim samting.

[Footnote]