“Medicine for Rabem Long Eye Bilong Iu”

JESUS Christ talem toktok hia for first-century Christian kongregeson long Laodicea, Asia Minor.

Jesus sei: “Baem . . . medicine for rabem long eye bilong iu mekem iu savve lukluk.” Diswan hem no really sik long eye, bat spiritual wei for blind wea need for kasem treatment. Fasin bilong datfala taon wea garem planti material samting affectim olketa Christian long Laodicea mekem olketa no wari abaotem trufala spiritual need bilong olketa.

Taem hem storyim disfala samting wea mekem olketa blind, Jesus sei: “Iu sei: ‘Mi rich and kasem staka samting and no needim eni samting moa,’ bat iu no savve iu barava no fit and no stap gud and iu poor and blind and naked.” Olketa member bilong datfala kongregeson no luksavve olketa needim ‘medicine for eye’ wea olketa savve kasem sapos olketa stap anda long teaching and discipline bilong Jesus Christ. Jesus sei: “Baem from mi.”—Revelation 3:17, 18.

Olsem olketa bilong Laodicea, olketa tru Christian distaem mas lukaot nogud wei bilong pipol for aftarem material samting and hapitaem hem affectim olketa. Samting for helpem iumi keepim healthy spiritual wei for lukluk hem showaot insaed disfala toktok: “Baem from [Jesus] . . . medicine for rabem long eye bilong iu mekem iu savve lukluk.”

Wanfala important point hem wei wea man need for baem datfala ‘medicine for eye.’ Hem garem kost. Man mas spendem taem for study and ting raonem Word bilong God. Man wea raetem psalm sei disfala Word, “hem klin, mekem [spiritual] eye shaen.”—Psalm 19:8.