Gudfala Waka Givim Glory Long God
Thru long gudfala fasin and nambawan waka olketa tru Christian givim glory long God. (1 Peter 2:12) Iumi savve lukim diswan from samting wea happen long Italy insaed olketa year wea just go pas.
Long September 1997, bigfala earthquake kasem samfala part bilong Marche and Umbria, wea spoelem klosap 90,000 haos. Olketa grup bilong Olketa Jehovah’s Witness kwiktaem givim help long olketa wea garem sem biliv and olketa narawan tu. Olketa givim go olketa trak wea man savve sleep insaed, blanket, stove, generator, and olketa nara samting wea olketa needim. Pipol barava lukluk long olketa waka hia.
Datfala niuspepa Il Centro sei: “Olketa first wan for arrive kam for help nao Olketa Jehovah’s Witness bilong Roseto [long province bilong Teramo] . . . Witim wei for hipap evritaem for prea, olketa wea faithful long Jehovah waka long wei wea barava help, olketa offerim help long olketa wea safa and no warim sapos olketa bilong difren religion.”
Mayor bilong Nocera Umbra, wanfala long olketa taon wea barava kasem trabol, raet go long Olketa Witness: “Mi thankiu tumas for help wea iufala givim long pipol bilong Nocera. Mi no daot hao evri pipol long datfala ples agree witim mi.” And tu, Ministry bilong Interior givim Congregazione Cristiana dei Testimoni di Geova (Christian Kongregeson Bilong Olketa Jehovah’s Witness) wanfala certificate for showimaot gudfala waka and wanfala medal “for showimaot waka wea olketa duim and gudfala wei wea olketa duim waka insaed datfala emergency wea kamap long area bilong Umbria and Marche.”
Long October 2000, wanfala nogud flood kasem area bilong Piedmont long north Italy. Long datfala taem tu, Olketa Witness kwiktaem duim samting for help. Pipol barava lukluk tu long evri gud waka hia. Datfala area bilong Piedmont givim olketa wanfala present wea olketa raet long hem for “spesol voluntary waka for saportim pipol bilong Piedmont wea kasem trabol long taem bilong flood.”
Jesus Christ talem olketa disaepol bilong hem: “Letem laet bilong iufala shaen front long olketa man, mekem olketa savve lukim olketa gudfala waka bilong iufala and givim glory long Father bilong iufala wea stap long heven.” (Matthew 5:16) Olketa Jehovah’s Witness hapi for givim glory long God, no long olketa seleva, taem olketa duim “olketa gudfala waka” wea helpem olketa neiba long spiritual wei and long olketa nara wei tu.