Wisdom Bilong Olketa Seleva

Wanfala toktok bilong olketa long Nigeria hem sei:“Olketa full grown man garem wisdom, bat olketa pikinini garem wisdom bilong olketa seleva.” Edwin, wanfala Christian elder long Nigeria, faendaot hao diswan hem tru.

Wanday, Edwin faendem wanfala metal box anda long desk bilong hem long haos.

Edwin askem thrifala pikinini bilong hem: “Bilong hu nao diswan?”

Emmanuel wea kasem eit year ansa: “Hem bilong mi.” Then hem kwiktaem talem hao datfala rasta 12 cm iron box wea garem smol hol antap hem for contribution for waka bilong Olketa Jehovah’s Witness evriwea long world. “From mi no savve go long Kingdom Hall evriday,” hem sei “mi disaed for wakem box mekem taem mi no iusim selen bilong mi for peim samting mi laekem long datfala day, bae mi savve putim insaed box hia.”

Dadi bilong Emmanuel garem wanfala box long haos for sevem selen for go attendim distrik convention evri year. Bat from famili kasem emergency, olketa mas iusim datfala selen. So for mek sure olketa bae no iusim selen bilong hem for eni nara samting, Emmanuel tekem wanfala old tin wea hem iusim for sevem selen insaed, go long man for welding for hem satem tin evribit. Taem man for welding herem wanem nao Emmanuel laek for duim witim datfala tin, hem mekem box for hem from olketa pis metal. Michael, brata bilong Emmanuel wea faev year, hem ask for wanfala box tu.

From hem sapraes long samting wea olketa pikinini duim, Edwin askem olketa why nao olketa askem datfala man for wakem olketa box hia. Michael ansa olsem: “Mi laek givim contribution!”

Parents bilong olketa no savve Emmanuel, Michael, and Uchei, sista bilong olketa wea naen year, bin go ahed for sevem lelebet selen from selen bilong olketa for peim lunch and olketa putim insaed olketa box hia. Wea nao olketa kasem idea for duim diswan? Taem olketa pikinini hia kasem age wea olketa fit for holem selen long hand bilong olketa, parents bilong olketa teachim olketa for putim selen insaed contribution box long Kingdom Hall. Luk olsem olketa pikinini lanem gud samting from diswan.

Taem olketa box fulap olketa katem open. Selen wea olketa sevem kasem $16—datwan hem no smol selen from long datfala kantri, pei bilong wanfala man for wan year hem maet samting olsem $1,600. Kaen donation olsem hem saportim preaching waka bilong Olketa Jehovah’s Witness wea olketa duim distaem long 235 kantri evriwea long world.