Wanfala Ples for Haed From Wind
HAE antap olketa alpine maunten long Europe, bae iu savve faendem wanfala strongfala plant wea olketa kolem alpine rose. Olketa smolfala plant hia, planti taem no savve grow hae bat grow klosap tugeta wea mekem olketa savve kasem protection from strongfala wind long maunten. Disfala wind wea blow kam olowe mekem laef bilong olketa alpine plant stap long danger from hem savve mekem temperature for katdaon, mekem air and graon kamap drae, and savve pullim rut bilong olketa.
Disfala alpine rose planti taem stap sef from wind from hem grow midolwan olketa rok. Nomata olketa ples hia no garem staka graon, olketa rok hia savve protectim olketa from wind and mekem disfala plant savve keepim wata. Long klosap full year hem hard for lukim disfala alpine rose, bat long taem bilong summer olketa redfala flaoa bilong hem mekem olketa maunten luk naes tumas.
Profet Isaiah explainim hao “olketa prince” bae kasem appointment from God, and each wan mas kamap olsem “wanfala ples for haed from wind.” (Isaiah 32:1, 2) Anda long direction bilong King, Christ Jesus, olketa spiritual prince hia, or overseer, bae kamap olsem olketa rok wea no savve seksek, wea stap strong long taem bilong hevi or trabol. Olketa bae olsem wanfala ples for haed wea man fit for trustim taem trabol kamap and wea bae helpem olketa wea garem need for keepim gud spiritual wata from Word bilong God.
Persecution, wei for wikdaon, or sik savve olsem wind wea banga againstim wanfala Christian, and mekem faith bilong hem kamap wik sapos hem no kasem protection. Olketa Christian elder savve givim protection taem olketa lisin long problem bilong hem, givim kaonsel wea garem faondeson long Bible, and givim encouragement or help long narafala wei. Olsem appointed King bilong olketa, Christ Jesus, olketa tu want for helpem olketa wea “stap olabaot.” (Matthew 9:36) And olketa laek for helpem olketa wea wind bilong false teaching spoelem olketa. (Ephesians 4:14) Kaen help olsem wea kam long barava taem hem important tumas.
“Mi kasem hard taem long laef bilong mi, taem samfala fren bilong mi insaed kongregeson lusim truth and, long datfala semtaem, Dadi bilong mi kasem wanfala brain hemorrhage,” Miriam hem sei. “From mi trae for winim sorre feeling bilong mi, mi start for frenim wanfala boy long world. No longtaem bihaen, mi barava feel olsem mi no fit, so mi talem olketa elder long kongregeson hao mi disaed for lusim truth, from mi feel sure Jehovah no savve lovem mi.
“Long datfala taem wea mi barava needim, wanfala elder wea kea hem mekem mi ting bak long wei wea mi bin wanfala regular pioneer minister bifor. Hem talem mi hao hem olowe tinghae long faithful fasin bilong mi and hem askem mi long kaenfala wei for letem olketa elder helpem mi, for strongim moa long mi love bilong Jehovah. Loving interest wea olketa showimaot long datfala taem wea mi barava needim hem olsem ‘wanfala ples for haed’ from spiritual cyclone wea mi stap insaed. Insaed wan month, mi finis for frenim boyfren bilong mi, and start long datfala taem mi go ahed for wakabaot moa insaed wei bilong truth.”
Olketa elder feel olketa kasem reward taem olketa lukim narafala Christian go ahed for grow gud long spiritual wei, from olketa kasem protection long barava taem wea olketa needim. And olketa ‘ples for haed’ hia hem olsem wanfala example for iumi wea showimaot olketa nambawan spiritual help wea bae iumi kasem insaed Wan Thousand Year Rul Bilong Christ.