‘Love Bilong Mifala Kamap Moa Deep’
LONG Friday, March 31, 2000, Mount Usu long Hokkaido, Japan, wea bin stap kwaet for 23 year hem bosta. Planti thousand pipol wea stap long datfala danger area mas ranawe. Staka pipol lusim olketa haos and ples for waka, bat gud nao no eniwan dae. Midolwan olketa wea ranawe hem 46-fala Witness bilong Jehovah, bat olketa kasem help.
Long sem day wea datfala maunten bosta, olketa start for arrangem olketa relief waka witim help bilong wanfala traveling Christian minister wea lukaftarem datfala area. Kwiktaem nomoa, olketa kongregeson wea stap klosap sendem kam olketa relief supply. Anda long direction bilong Japan branch, olketa kwiktaem startim wanfala relief komiti, and olketa kasem planti donation for relief fund from Olketa Jehovah’s Witness wea stap evriwea long Japan. For saportim spiritual waka, Olketa Jehovah’s Witness sendem go olketa full-taem minister long olketa kongregeson wea stap long danger area, and circuit overseer visitim datfala area planti taem for givim help saed long feeling and spiritual saed.
Long datfala hard taem Olketa Witness long datfala area go ahed for garem olketa Christian meeting insaed olketa haos wea stap long sef area. Taem olketa herem hem olraet for go bak long area wea Kingdom Hall stap long hem, olketa go and lukim datfala building hem lei wansaed, krak, and barava spoel. No farawe from Kingdom Hall, hol wea volcano mekem hem still garem smoke. Olketa Witness tingting, ‘Hem wise for garem olketa meeting long datfala area? Waswe, bae fit for repairim Kingdom Hall?’
Olketa disaed for buildim wanfala niu Kingdom Hall long ples wea moa sef long wanfala area wea klosap. Olketa kasem help wea olketa needim from Regional Building Komiti. Selen wea Olketa Witness evriwea long kantri donatem olketa iusim for datfala construction. Olketa kwiktaem kasem land, and from help bilong staka handred volunteer, olketa kwiktaem buildim wanfala niu Kingdom Hall. Long Sunday, July 23, 2000, long first meeting wea olketa garem insaed datfala niu Kingdom Hall, 75 pipol attend. Planti wea attend krae from hapi. Taem olketa dedicatem datfala Kingdom Hall long October long datfala sem year, wanfala elder bilong kongregeson hem sei: “Taem maunten bosta hem mekem planti trabol and wei for safa kamap. Bat, disfala construction mekem wei wea mifala fraet hem change for kamap hapi. Love bilong mifala for Jehovah and olketa Christian brata hem kamap moa deep!”
[Piksa Credit Line long page 19]
Taem Mount Usu hem Bosta: AP Photo/Koji Sasahara