Gudfala Leader—Wanfala Challenge Evriwea Long World
Hem man for raetem buk and poetry. Heart bilong hem barava fulap witim hope for future. Klosap 90 year go finis, hem ting abaotem wanfala ples “wea mind bilong man no garem feeling for fraet and man savve liftimap hed bilong hem from hem feel gud; wea savve hem free; wea world no divaed long olketa nation; wea olketa toktok kam from truth; [and] wea pipol no savve taed for trae hard for kamap perfect.”
DISFALA man for raet hem go ahed for talemaot hope bilong hem hao wanday bae pipol long kantri bilong hem and evriwea long world kasem wanfala ples olsem. Sapos disfala man wea raetem poetry wea winim Nobel Prize hem laef distaem bae hem barava sorre fogud. From nomata world hem muv forward and winim planti samting, world hem divaed winim eni nara taem. And luk olsem hope bilong olketa man for future hem nating klia.
Taem samwan askem wanfala farmer why nao faet hem seknomoa kamap midolwan samfala sekson long kantri bilong hem, hem talem wanem hem tingse hem reason bilong datfala problem. Hem sei: “Hem from olketa nogud leader.” Long buk bilong hem Humanity—A Moral History of the Twentieth Century, man for raetem history Jonathan Glover hem talemaot klosap sem tingting taem hem sei: “Wei for killim dae olketa man [long datfala sem kantri] hem no seknomoa kamap from olketa tribe heitim each other, hem samting wea olketa pipol wea laek for garem paoa nao planim.”
Taem war kamap midolwan tufala sekson insaed Yugoslavia bifor, long start bilong olketa year bilong 1990, wanfala woman wea raet for niuspepa raet olsem: “Mifala bin stap hapi tugeta for planti year bat gogo distaem pipol go ahed for killim olketa baby bilong each other. Why nao mifala duim olketa samting olsem distaem?”
Kantri bilong India wea stap planti thousand kilometer from Europe, hem ples wea datfala man for raetem poetry wea iumi storyim long firstaem hem born. Taem man for raet, Pranay Gupte, givim wanfala tok wea garem title “Waswe, India Savve Win Olsem Wanfala Nation?,” hem sei: ‘Samting olsem 70 percent long pipol bilong India no kasem 30 year, bat no eni leader hem gud example for olketa followim.’
Long samfala kantri, olketa leader mas lusim position bilong olketa from olketa kotem olketa for raverave fasin. Olsem iumi lukim, planti reason stap why world distaem kasem problem long saed bilong wei for lead. Evri samting wea happen distaem pruvim hao toktok bilong profet wea stap samting olsem 2,600 year go finis hem barava tru. Hem sei: “Wei bilong man hem no bilong hem. Hem no bilong man wea wakabaot for disaedem gogo bilong hem.”—Jeremiah 10:23.
Waswe, eni ansa stap for disfala problem wea stap long world distaem? Hu nao savve leadim olketa man for kasem wanfala world wea no divaed from raoa and wea no fulap witim fraet, wea trufala savve hem free and staka, and wea olketa man gogo for kamap perfect?
[Piksa Credit Linelong page 3]
Fatmir Boshnjaku