No Olo Tumas for Lane
KSENIYA hem born long 1897. Hem garem 3-fala dota, wanfala son, 15-fala granpikinini, and 25 great granpikinini. Long full laef bilong hem, hem duim wanem parents bilong hem teachim hem for duim. Nomata hem kam long Moscow olsem wanfala refugee from war wea go ahed long Abkhaz Republic, wea stap midolwan Black Sea and Caucasus, hem satisfae nomoa witim laef bilong hem, especially witim religion bilong hem wea kam from olketa laen dadi bilong hem.
Long 1993, Meri, dota bilong Kseniya hem kamap wanfala Jehovah’s Witness. Meri start for story long Kseniya abaotem Jehovah God and Bible, bat hem nating want for lisin long hem. Kseniya go ahed for talem dota bilong hem, “Mi olo finis for lanem eni niu samting.”
Nomata olsem, dota bilong hem Meri; waef bilong granson bilong hem, Londa; and tufala great granpikinini bilong hem Nana and Zaza, wea kamap olketa Jehovah’s Witness, go ahed for story long hem abaotem Bible. Wanfala evening long 1999, olketa readim wanfala scripture long Kseniya wea kasem heart bilong hem. Hem toktok bilong Jesus long olketa faithful aposol bilong hem taem hem startim Evening Kaikai bilong Lord. (Luke 22:19, 20) Taem hem 102 year, Kseniya disaed datfala evening for start studyim Bible.
Hem sei: “Bihaen mi laef for 102 year, mi just savve nao long mining bilong laef. Distaem mi luksavve hao no eni samting hem moabeta winim wei for servem nambawan, loving God bilong iumi, Jehovah. Mi still strong and healthy. Mi savve read nomoa nomata mi no iusim eyeglas and strong for kaban witim famili bilong mi.”
Long November 5, 2000, Kseniya hem baptaes. Hem sei: “Distaem mi givim laef bilong mi long Jehovah for servem hem witim love. Mi givimaot olketa magasin and tract taem mi sidaon long bas-stop klosap long haos bilong mi. Olketa relative kam evritaem for visit, and mi hapi for sharem truth abaotem Jehovah witim olketa.”
Kseniya hem luk forward for datfala day taem ‘body bilong hem kamap gudfala moa winim taem hem young; and hem kasem bak strong olsem young wan.’ (Job 33:25) Sapos samwan wea winim 100 year hem no feel olsem hem olo tumas for lanem mining bilong laef from Bible, waswe long iu?