Iumi Need for Savve Hu Nao God
WASWE, iu kasem spesol feeling taem iu lukim skae wea fulap witim olketa star long wanfala klia naet? Waswe, smel bilong olketa flaoa hem naes long iu? Hao, iu savve enjoyim wei for lisin long singsing bilong olketa bird and saond bilong olketa leaf wea wind blowim? And olketa whale wea garem bigfala paoa and nara samting bilong sea savve barava kasholem interest bilong man! Man born kam witim wanfala conscience and brain wea barava spesol. Hao nao iu ting olketa nambawan samting hia wea stap raonem iumi olketa kamap?
Samfala bilivim hao evriting hia kamap seleva. Bat sapos diswan hem tru, why nao olketa man biliv long God? Hao nao wanfala accident midolwan olketa difren kaen chemical gogo wakem olketa man wea garem spiritual need?
“Religion hem barava part long fasin bilong man and hem samting wea pipol bilong evrikaen living and education garem.” Disfala toktok hem bilong professor Alister Hardy bihaen hem duim research, wea insaed buk bilong hem The Spiritual Nature of Man. Olketa test long brain leadim olketa scientist for sei luk olsem mang garem “garem program” for followim religion. Buk wea garem title Is God the Only Reality? hem sei: “Wei for lukaotem mining thru long religion . . . hem samting wea pipol bilong evri ples and from olketa difren taem bin duim from taem man start laef.”
Tingim samting wea wanfala man wea skul gud hem talem samting olsem 2,000 year bifor. Hem raet: “Evri haos garem samwan wea wakem, bat man wea wakem evri samting hem God.” (Hebrews 3:4) Tru nao, first verse bilong Bible hem sei: “Long firstaem, God creatim heven and earth.”—Genesis 1:1.
Bat, hu nao God? Olketa man garem olketa difren ansa for disfala kwestin. Taem olketa askem hem hu nao God, wanfala teenager from Japan teenager wea nem bilong hem Yoshi hem ansa: “Mi no sure. Mi wanfala Buddhist, and hem no bin important long mi for savve hu nao God.” Bat, Yoshi talem stret hao staka pipol ting long Buddha olsem wanfala god. Nick, wanfala bisnisman wea winim 60 year, biliv long God and ting long hem olsem wanfala maeti paoa. Taem olketa askem hem for explainim wanem hem savve abaotem God, hem tingting for lelebet longtaem bifor hem ansa olsem: “Fren bilong mi, datwan hem barava hard kwestin. Only samting mi savve talem nomoa, God hem stap.”
Samfala pipol “worshipim and servem creation bilong God and no Creator.” (Romans 1:25, Today’s English Version) Staka million pipol worshipim olketa laen dadi wea dae finis from olketa biliv God hem farawe tumas for iumi man kasem hem. Long Hindu religion, staka man god and woman god stap. Long taem bilong olketa aposol bilong Jesus Christ, pipol worshipim olketa god olsem Zeus and Hermes. (Acts 14:11, 12) Staka church bilong Christendom teachim hao God hem wanfala Trinity wea insaed long hem God datfala Father, God datfala Son, and God datfala Holy Spirit.
Tru nao, Bible hem sei: “planti ‘god’ and planti ‘lord’ stap.” Bat, hem sei moa: “Iumi garem wanfala God datfala Father nomoa, wea evri samting kamap from hem.” (1 Corinthians 8:5, 6) Yes, wanfala tru God nomoa stap. Bat hu nao hem? Hem garem wanem kaen fasin? Hem important for iumi savve long ansa for olketa kwestin hia. Jesus seleva prea long disfala God olsem: “Diswan nao minim laef olowe, for olketa kasem savve long iu, only trufala God, and long datwan wea iu sendem kam, Jesus Christ.” (John 17:3) Reason stap for biliv hao hapi bilong iumi for olowe hem depend long truth abaotem God.
[Piksa long page 3]
Wanem nao bihaenem wei wea olketa stap?
[Credit Line]
Whale: Courtesy of Tourism Queensland
[Piksa Credit Line long page 2]
COVER: Index Stock Photography © 2002