Waswe, Iu Minim Love Bilong God?

WANFALA datfala man Job iusim olketa toktok hia for storyim wei wea man no perfect: “Man, wea born from woman, garem shortfala laef and fulap witim trabol. Olsem wanfala flaoa hem kamap and hem dae, and hem ranawe olsem shadow and no stap laef.” (Job 14:1, 2) Laef bilong Job long datfala taem, hem fulap witim wari and sorre. Waswe, iu feel olsem enitaem?

Bat nomata iumi feisim olketa hard samting and problem, strongfala hope stap, hope wea garem faondeson long kea and love bilong God. First samting, Father bilong iumi long heven wea showimaot mercy givim ransom sakrifaes mekem olketa man kamap free from wei wea olketa sin. Long John 3:16, 17 Jesus Christ hem sei: “God lovem world [olketa man] tumas dastawe hem givim only-born Son bilong hem, mekem evriwan wea showimaot faith long hem no need for dae bat kasem laef olowe. From God sendem Son bilong hem [Jesus] long world, no for hem judgem world, bat for world sev thru long hem.”

Tingim tu kaenfala tingting wea God showimaot long olketa man wea no perfect. Aposol Paul hem sei: “And hem mekem evri nation bilong man from wanfala man, for stap long full earth, and hem markem olketa taem wea set finis and putim olketa mark for olketa man, for olketa lukaotem God, sapos olketa barava lukaotem hem and really faendem hem, bat, hem no farawe from iumi wanwan.” (Acts 17:26, 27) Tingim diswan! Nomata iumi olketa man wea no perfect, iumi savve still enjoyim wei for fren witim loving Creator bilong iumi, Jehovah God.

So, iumi savve feisim future witim trust, from iumi savve hao God hem kea for iumi and long loving wei hem duim samting for helpem iumi for olowe. (1 Peter 5:7; 2 Peter 3:13) So iumi garem strongfala reason for lanem moa samting abaotem loving God bilong iumi thru long wei for studyim Word bilong hem, Bible.