Taem wea Fitim for Talemaot Wanfala Secret

Wei for keepim samting secret savve stopem raoa and mekem peace go ahed. Bat, waswe, enitaem hem fitim for talemaot wanfala secret samting? Tingim samting wea profet Amos talem abaotem God bilong hem: “Jehovah bae no duim eni samting sapos hem no talem firstaem secret samting bilong hem long olketa servant bilong hem, olketa profet.” (Amos 3:7) From toktok hia, iumi savve lanem samting abaotem wei for keepim samting secret. Jehovah savve keepim samting secret for samfala taem and gogo hem savve talemaot long samfala man wanwan. Hao nao iumi savve followim Jehovah long diswan?

Samfala taem, olketa shepherd wea kasem appointment insaed Christian kongregeson faendem hem gud for keepim samfala samting secret. (Acts 20:28) Olsem example, from olketa ting for helpem kongregeson, olketa shepherd hia maet disaed for keepim secret information abaotem olketa arrangement or samfala change long olketa responsibility insaed kongregeson go kasem taem wea fitim.

Bat long samting olsem, hem important for olketa elder mekem klia long olketa wea insaed diswan sapos olketa bae talemaot diswan or nomoa, and wanem taem, and long wanem wei nao olketa bae duim. Wei for savve wanem taem for talemaot wanfala samting savve helpem olketa long wei for keepim olketa samting secret.—Proverbs 25:9.