Hapi Tumas From Olketa Lane for Read!
LONG samfala part long Solomon Islands, klosap 80 percent bilong olketa wea kamap Olketa Jehovah’s Witness stragol witim wei for no savve read and raet. Diswan mekem hem hard for olketa tekpart insaed olketa meeting evri week, and tu hem mekem hem hard for olketa teachim truth bilong kingdom long olketa narawan. Waswe, wanfala full-grown man wea no savve hao for holem pencil savve lane for read and raet?
Klosap evri kongregeson bilong Olketa Jehovah’s Witness long Solomon Islands garem wanfala read and raet class wea olketa iusim datfala brochure Work Hard for Read and Raet, wea Olketa Jehovah’s Witness pablisim. Olketa experience long daon showimaot hao planti long olketa kasem help for mekem savve bilong olketa kamap moabeta thru long disfala program. Moa important, wei wea olketa lane for read hem helpem olketa for kamap moabeta long wei for talemaot faith bilong olketa.—1 Peter 3:15.
Wanfala missionary sista wea kasem assignment long wanfala kongregeson wea garem winim wan handred Kingdom pablisa lukim hao taem olketa duim Bible study evri week insaed Wastaoa magasin, staka no garem copy bilong olketa seleva and samfala nomoa ansa. Why nao olsem? From olketa no savve read and raet. Taem kongregeson announcem hao wanfala read and raet skul bae kamap, missionary hia hapi for volunteer for kamap wanfala teacher. Long firstaem, tu-thri student nomoa kam, bat gogo klosap 40 pipol wea evriwan garem difren age start for attend.
Wanem nao kamaot from diswan? Missionary hia sei olsem: “No longtaem bihaen olketa read and raet class start, mi go long market long six klok long morning for peim kaikai for missionary hom. Long there mi lukim samfala long olketa student, nomata olketa young wan tu, olketa sellim olketa kokonat and vegetable. Why nao olsem? Bikos olketa laek for kasem selen for peim baero and buk for iusim insaed read and raet class! And tu, wei wea olketa attendim datfala class hem muvim olketa for garem copy bilong Wastaoa magasin bilong olketa seleva.” Hem sei moa: “Distaem insaed Wastaoa Study bilong kongregeson, olketa young and olo tekpart, and koment bilong olketa barava interesting.” Missionary hia barava hapi taem fofala member bilong datfala class ask for share insaed preaching waka bikos, olketa sei, olketa “no fraet nao.”
Olketa gud samting wea olketa student kasem hem no just wei for read and raet bat long nara wei tu. Olsem example, for planti year wanfala woman wea no biliv wea maritim wanfala Witness hem bin mekem kongregeson for wari. Hem savve kros kwiktaem and sutim ston long pipol and tu hem savve attakim olketa nara woman witim pis timba. Samfala taem wea hem kam long olketa meeting witim hasband bilong hem, woman hia jealous tumas, so hasband mas werem dark glass mekem woman hia no sei dat hem lukluk long olketa nara woman.
Bat no longtaem bihaen olketa read and raet class start, disfala woman ask olsem long kwaet wei: “Waswe, mi savve joinim datfala class?” Ansa hem yes. Start long datfala taem hem nating missim eni class or kongregeson meeting. Hem waka hard long olketa leson bilong hem for read and hem barava muv ahed, diswan mekem hem barava hapi. Next samting hem askem nao: “Waswe, mi savve garem wanfala Bible study?” Hasband bilong hem hapi for startim study witim hem, and hem go ahed for grow long savve bilong hem for read and raet and savve bilong Bible.
Hem bigfala challenge for wanfala man wea kasem 50 year wea no holem eni pencil bifor, for iusim wanfala pencil and trae for raetem olketa leta. Samfala gogo garem soa long finger from taem olketa first start for raet olketa holem pencil and raet long wei wea strong tumas. Bihaen planti week wea olketa stragol for holem and kontrolem pencil, samfala student sei olsem witim hapi smile: “Distaem hand bilong mi no hevi for raet long pepa!” Taem olketa teacher lukim wei wea olketa student muv ahed hem mekem olketa hapi tu. Wanfala teacher sei olsem: “Taem mi teachim wanfala class hem mekem mi barava hapi, and planti taem olketa student showimaot wei wea olketa tinghae long disfala samting wea Jehovah provaedem taem olketa klapim hand long end bilong olketa leson.”
Olketa missionary and tu olketa Witness hia wea savve read distaem, olketa hapi. Why nao olsem? Bikos distaem olketa savve iusim savve bilong olketa for read and raet for givim honor long Jehovah.
[Olketa Piksa long page 8, 9]
Olketa young wan and olketa olo tinghae long olketa read and raet class