“Waswe, Iufala Savve Why Nao Mi Givim Bak Selen Bilong Iufala?”

‘OH, MI barava needim selen!’ hem nao tingting bilong Nana, wanfala singol mami bilong thrifala boy wea stap long Kaspi long Republic bilong Georgia. Wanfala morning hope bilong hem for faendem selen hem kamap tru. Hem faendem 300 lari klosap long police station. No eniwan stap long there. Hem barava big selen. Tru nao, Nana nating lukim yet eni 100 lari note insaed faevfala year wea olketa start for iusim lari olsem selen bilong datfala kantri. Olketa lokol bisnisman no savve kasem big selen olsem nomata bihaen olketa waka hard for samfala year.

Tingting bilong Nana hem olsem: ‘Sapos mi bae lusim faith, fasin for fraet long God, and spiritual fasin bilong mi, wanem nao disfala selen bae givim long mi?’ Hem mekem grow finis olketa Christian fasin olsem and stand strong taem hem kasem barava raf persecution witim wei for hitim hem from biliv bilong hem.

Taem hem go long police station, Nana lukim faevfala policeman trae for lukaotem wanfala samting. Hem savve olketa lukaotem datfala selen, so hem go long olketa and sei: “Waswe, iufala lusim eni samting?”

“Selen,” olketa ansarem hem.

“Haomas?”

“Thri handred lari!”

“Mi faendem selen bilong iufala,” Nana hem sei. Then hem ask: “Waswe, iufala savve why nao mi givim bak selen bilong iufala?” Olketa no savve.

“Bikos mi wanfala Jehovah’s Witness,” hem sei. “Sapos nomoa, mi bae no givim bak selen bilong iufala.”

Bigman bilong police wea lusim selen hia givim Nana 20 lari for showimaot thankiu for honest fasin bilong hem.

Story hia kwiktaem go raon evriwea long Kaspi distrik. Long next day, wanfala woman wea duim klining wea kamaot from datfala police station sei long Nana: “[Datfala bigman bilong police] evritaem keepim buk bilong iufala long office bilong hem. Distaem nao maet hem tinghae moa long hem.” Wanfala policeman hem sei: “Sapos evri pipol kamap Olketa Jehovah’s Witness, hu nao bae duim criminal fasin?”