“Willing for Forgivim Narawan”

WASWE, iu biliv God hem forgivim olketa sin bilong iu? Long United States, ansa bilong staka full-grown man hem yes. Dr. Loren Toussaint, firstfala man wea raet abaotem wanfala study wea olketa duim long University of Michigan Institute for Social Research, reportim hao, long 1,423 pipol, long America, wea olketa askem, samting olsem 80 percent long olketa wea winim 45 year sei God forgivim olketa sin bilong olketa.

Bat hem interesting hao 57 percent nomoa sei olketa forgivim nara pipol. Diswan mekem iumi tingim toktok bilong Jesus long Sermon long Maunten: “Sapos iufala forgivim sin bilong olketa man, Father bilong iufala long heven bae forgivim iufala tu; bat sapos iufala no forgivim olketa man sin bilong olketa, Father bilong iufala tu bae no forgivim olketa sin bilong iufala.” (Matthew 6:14, 15) Tru nao, wei wea God forgivim sin bilong iumi hem depend long wei wea iumi duim part bilong iumi for forgivim nara pipol.

Aposol Paul remindim olketa Christian long Colossae abaotem disfala principle. Hem encouragem olketa olsem: “Go ahed for patient witim narawan and willing for forgivim narawan sapos eniwan garem reason for komplen againstim narawan. Olsem Jehovah hem willing for forgivim iufala, iufala mas duim olsem tu.” (Colossians 3:13) Hem tru, diswan hem no isi evritaem. Olsem example, taem samwan tok nogud long iu, hem savve hard for forgivim hem.

Nomata olsem, staka gud samting savve kamaot from wei for forgive. Dr. David R. Williams, wanfala savveman saed long science research hem sei: “Mifala faendem hao, long America, midolwan olketa wea 40 year and winim, fasin for forgivim nara man hem barava join witim health saed long mind.” Diswan hem agree witim toktok bilong wise King Solomon, wea raet olsem samting olsem 3,000 year bifor: “Wanfala kwaet heart hem laef bilong body bilong man.” (Proverbs 14:30) From fasin for forgivim man hem strongim wei for fren witim God and neiba, iumi garem gud reason for willing for forgivim narawan from heart.—Matthew 18:35.