“Hem Leadim Mi Saed Long Kwaet Wata”

LONG olketa Bible land wea hot tumas, olketa sheep need for drink evriday. So, important part long waka bilong wanfala shepherd hem for provaedem wata for olketa sheep bilong hem. Samfala taem olketa shepherd tekem wata from wanfala well and givim for olketa sheep. (Genesis 29:1-3) Bat, especially long season bilong rain, area raonem olketa smol river kamap olketa peaceful, “ples for rest wea garem staka wata.”—Psalm 23:2.

Wanfala gud shepherd mas savve wea for faendem wata and kaikai for olketa sheep bilong hem. Sapos hem savve gud long wanfala area, olketa sheep bilong hem stap laef. David, wea spendem planti year olsem shepherd long olketa hill bilong Judea, hem markem wei wea God hem lead long spiritual wei witim shepherd wea leadim olketa sheep bilong hem long gudfala kaikai and wata wea givim laef. Long wanfala Bible transleison, David hem sei: “Hem leadim mi saed long kwaet wata.”—Psalm 23:1-3, New International Version.

Planti year bihaen, thru long profet Ezekiel, Jehovah iusim wanfala tokpiksa wea semsem olsem datwan. Hem promis for tekem kam bak pipol bilong hem from olketa difren land wea olketa stap, olsem wanfala shepherd hipimap olketa sheep bilong hem. Hem promisim olketa: “Bae mi tekem olketa . . . long graon bilong olketa and feedim olketa long olketa maunten bilong Israel, saed long olketa stream.”—Ezekiel 34:13.

Jehovah God interest tumas tu for provaedem spiritual wata. Buk bilong Revelation storyim “wanfala river bilong wata bilong laef” wea ran kamaot from throne bilong God. (Revelation 22:1) Datfala invitation for drink from disfala river hem for evriwan. “Eniwan wea wantem [savve] tekem free wata bilong laef.”—Revelation 22:17.

Disfala tokpiksa wata bilong laef hem piksarem evri arrangement bilong God for laef olowe. Eniwan savve start for drink from wata olsem long wei for ‘kasem savve long only trufala God and long datwan wea hem sendem kam, Jesus Christ.’—John 17:3.