Report Bilong Olketa wea Talemaot Kingdom
Medal for Praisem Lukluk Bilong Wanfala Kingdom Hall
MINISTRY of Environment long Finland markem year 2000 olsem “Year of Landscaping.” Wanfala long olketa wea organizem diswan hem sei “purpose bilong disfala theme bilong year for mekem area luk naes hem for remindim iumi evriwan abaotem wei wea olketa green grass and tree affectim laef bilong iumi evriday and wei wea iumi stap gud.”
Long January 12, 2001, wanfala leta from datfala Finnish Association of Landscape Industries hem kasem branch office bilong Olketa Jehovah’s Witness long Finland. Datfala leta talem hao olketa chusim Kingdom Hall bilong Olketa Jehovah’s Witness long Tikkurila for kasem wanfala long olketa medal bilong datfala theme bilong year for mekem area luk naes, bikos long wei wea hem garem spesol plan and area raonem hem luk naes. Leta hia talem tu hao “nomata long hot season or cold season, lukluk bilong area raonem datfala Kingdom Hall hem naes tumas and hem kasem barava hae standard.”
Olketa givim medal hia long Olketa Jehovah’s Witness long Rosendahl Hotel long Tampere, Finland, long wanfala spesol hipap wea 400 savveman and bisnisman nao attendim. Datfala Finnish Association of Landscape Industries talem tu disfala toktok for pablisim insaed niuspepa: “Long olketa difren part bilong disfala kantri, klosap evri Kingdom Hall bilong Olketa Jehovah’s Witness barava luk naes. Wei wea olketa lukaftarem gud area raonem kasholem interest bilong klosap evriwan wea go pas. Datfala Kingdom Hall long Tikkurila hem wanfala example bilong wei wea building and area raonem barava balance gud tugeta.”
Long Finland 233 Kingdom Hall nao stap, wea planti garem olketa naesfala garden raonem. Bat samting wea mekem olketa luk naes tumas nao hem wei wea olketa nao ples bilong trufala worship and Bible education. Long winim six million Jehovah’s Witness raonem world, wanfala Kingdom Hall—nomata hem garem spesol plan or simpol nomoa—hem ples wea olketa lovem tumas. Dastawe olketa strong for lukaftarem gud long loving wei. Door bilong evri Kingdom Hall hem open for evriwan long community wea iu stap long hem!