Olketa Ples for Worship—Waswe, Iumi Needim Olketa?
‘Insaed olketa road wea stap raonem church, planti thousand pipol wea travel kam from olketa difren part bilong datfala kantri werem kalakala kaleko. Insaed diswan hem olketa grup bilong olketa Indian wea followim beat bilong drum taem olketa duim dance bilong bifor. And tu olketa wea strong for biliv wea trae hard and kasem pain from olketa krol long knee bilong olketa. Evriwan hia go for kasem ples wea olketa image stap.’
HEM nao hao niuspepa El Economista storyim staka pipol wea hipap long December 2001. Long datfala taem samting olsem thri million pipol visitim datfala church long Mexico City for showimaot faith long datfala Virgin of Guadalupe. Planti thousand visitor interest tu for visitim olketa nara lotu building, olsem St. Peter’s Basilica long Rome.
Planti pipol wea laek for worshipim God ting long olketa lotu building olsem spesol samting wea man shud tinghae long hem. Maria wea kam from Brazil hem sei: “Long mi, church hem ples wea savve mekem mi stap klosap long God, hem wanfala holy ples. Mi biliv hao wei for go long church hem mekem soul kamap klin and hem wanfala sin sapos mi no go long Mass and long confession evri Sunday.” Consuelo from Mexico sei: “Church hem mekem strongfala feeling for kamap insaed long mi; mi barava tinghae long hem. Taem mi long there, mi feel olsem mi long heven.”
Nomata samfala tinghae tumas long olketa church, olketa narawan daotem wei wea iumi needim olketa ples for worship. Taem hem story abaotem wei wea planti pipol no savve go long church, Peter Sibert, wanfala Catholic priest long England, hem sei: “[Pipol] chusim olketa part long religion wea olketa laekem. Planti olo nao olketa Catholic and olketa live followim biliv bilong olketa—bat olketa young wan no garem datkaen feeling for biliv strong.” Long November 20, 1998, Daily Telegraph bilong London hem sei: “Start kam from 1979 olketa klosim samting olsem 1,500 church long England bat olketa openem 495 church nomoa and 150 church olketa fixim bak.”
Long 1997 Süddeutsche Zeitung, niuspepa bilong Munich, Germany, report olsem: “Olketa changem olketa church for kamap olketa cinema and haos: Olketa wea biliv no gogo for service long olketa church, olketa changem olketa ples bilong worship for kamap difren samting. . . . Samting wea olketa duim finis long Netherlands or England hem happen distaem long Germany.” Hem sei tu: “Man savve faendem samting olsem 30 or 40 church wea olketa laek sellim long Germany insaed olketa year wea just go pas.”
Waswe, olketa lotu building important part long wei for worshipim God? Waswe, eni example insaed Bible for showimaot hao iumi mas garem bigfala church building and stael church? Wanem kaen building nao bin join witim wei for worshipim tru and living God? Olketa building hia teachim iumi wanem samting abaotem need for garem olketa ples for worship and abaotem samting wea shud kamap long there?