Hard Waka wea Apim Standard Bilong Fasin

Gogo for end bilong 2001, pipol wea lisin long main radio station bilong Mozambique herem disfala announcement:

“President bilong Republic visitim branch office bilong Olketa Jehovah’s Witness long Maputo. Hem encouragem Olketa Jehovah’s Witness for go ahed moa strong long waka wea olketa duim for apim standard bilong fasin insaed olketa famili and for wei wea olketa helpem olketa wea full-grown thru long teaching program for read and raet. Disfala program helpem finis samting olsem 10,000 pipol. Olsem President Chissano talem, olketa program olsem fit for kasem praise bikos olketa wanfala bigfala help long community saed long wei for deal witim olketa problem bilong education wea kantri go ahed for feisim.”

Announcement hia go ahed for pleim wanfala part bilong toktok bilong President wea olketa recordim: “Hem gud tumas for iumi lukim wei wea staka pipol interest for read and raet. Hem showim iumi hao pipol bilong community bae helpem iumi apim namba bilong olketa wea savve read and raet. So, mi laek for encouragem Olketa Jehovah’s Witness for go ahed moa strong long olketa education program bilong olketa, nomata wanem languis. Important samting nao hem for pipol savve read and raet and isi for sharem information and long future duim moa saed long education.”

Olketa Jehovah’s Witness long Mozambique garem olketa class for lane for read and raet long 850 ples long datfala kantri, mekem pipol savve readim seleva Word bilong God. Witim diswan, olketa conductim samting olsem 50,000 free hom Bible study evri week. Evriting hia hem part bilong Bible education program evriwea long world wea distaem kasem 235 kantri. (Matthew 24:14) Iu tu savve kasem gud samting from disfala program. Plis feel free for raet go long Olketa Jehovah’s Witness klosap long iu.