Pipol Rememberim Olketa Witness Bilong Jehovah wea Pipol Killim Dae
LONG March 7, 2002, taon bilong Körmend long west Hungary duim ceremony for showimaot wanfala metal raeting. Hem for rememberim dae bilong thrifala Jehovah’s Witness wea olketa Nazi killim dae long 1945.
Olketa putim metal raeting hia long wall bilong headquater bilong fire department long Hunyadi Road, ples wea olketa killim dae thrifala hia front long pablik. Olketa dedicatem diswan for rememberim ‘olketa Christian wea olketa Nazi killim dae long March 1945 from olketa no join insaed war bikos diswan againstim conscience bilong olketa. Antal Hőnisch (1911-1945), Bertalan Szabó (1921-1945), János Zsondor (1923-1945), 2002, Olketa Jehovah’s Witness.’
Olketa killim dae thrifala just tufala month bifor end bilong World War II. Why nao olketa killim dae thrifala Christian hia? Niuspepa bilong Hungary, Vas Népe explainim: “Bihaen Hitler hem kasem paoa long Germany, hem targetim no olketa Jew nomoa, bat olketa faithful member bilong Olketa Jehovah’s Witness tu kasem persecution and safa, go long olketa concentration camp and dae sapos olketa no denyim biliv bilong olketa. . . . Long March 1945, bigfala wei for fraet kamap long west part bilong Hungary. . . . Part long disfala raf fasin hem wei for aotem and killim dae Olketa Jehovah’s Witness.”
Ceremony for showimaot datfala metal raeting hem divaed long tufala part. First wan kamap long theater bilong Batthyány Castle, wea olketa speaker nao hem Professor Szabolcs Szita, bigman bilong Holocaust Documentation Center long Budapest; László Donáth, member bilong Parliament’s Committee for Human Rights, Minority and Religious Affairs; and Kálmán Komjáthy, wanfala man wea lukim taem olketa Nazi killim thrifala hia wea distaem hem kamap savveman abaotem history bilong datfala taon. Winim 500 pipol wea hipap wakabaot akrosim taon for mek-tu part bilong datfala program—taem wea Mayor József Honfi bilong Körmend showimaot disfala metal raeting long pablik.
Insaed leta bilong hem for sei gudbae, Ján Žondor (János Zsondor) encouragem olketa Christian brata and sista bilong hem for no sorre. Hem raet olsem: “Mi rememberim evritaem toktok bilong John long Revelation 2:10: ‘Pruvim iuseleva faithful go kasem dae’ . . . Talem evriwan insaed hom for no sorre, bikos mi dae for truth and no olsem wanfala criminal man.”
[Piksa long page 32]
Bertalan Szabó
[Piksa long page 32]
Antal Hőnisch
[Piksa long page 32]
Ján Žondor