“Mi Faendem Evriting wea Mi Needim”

WANFALA report bilong World Health Organization showaot hao wei for sik long mind hem affectim samting olsem 120 million pipol evriwea long world. Evri year, wan million pipol suisaed and midolwan 10 and 20 million pipol trae for endim laef bilong olketa seleva. Wanem help nao stap for olketa wea safa from wei for sik long mind? Treatment saed long medical maet daonem disfala wei for safa, and hem barava important for kasem saport saed long feeling. And tu, samfala wea experiencem olketa kaen feeling olsem faendem gudfala samting long olketa Bible pablikeson bilong Olketa Jehovah’s Witness, olsem disfala leta from France showimaot.

“No longtaem go nomoa, mi no lukim eni purpose for mi go ahed stap laef. Mi prea long God for letem mi dae. Hem olsem mi dae finis insaed. For luk aotem wei for kasem help, mi barava prea strong long Jehovah. Mi disaed tu for readim 2002 Yearbook of Jehovah’s Witnesses and mi finisim insaed thri-day nomoa. Tru nao, mi kasem encouragement long bigfala wei and faith bilong mi kamap moa strong.

Mi duim research long olketa Wastaoa and Wekap! magasin, and mi sapraes fogud! Mi bin readim olketa magasin hia evritaem for winim 15 year, bat mi nating luksavve hao olketa article savve encouragem and muvim man. Olketa fulap witim love—wanfala fasin wea hard tumas for faendem distaem. Mi faendem evriting wea mi needim.”

Bible hem sei: “Jehovah hem stap klosap long olketa wea heart bilong olketa brek; and hem sevem olketa wea spirit bilong olketa pisis.” (Psalm 34:18) For sure, olketa wea “heart bilong olketa brek” or “spirit bilong olketa pisis” savve faendem encouragement and garem hope for future long Bible. Olketa Jehovah’s Witness givimaot Bible literature for helpem olketa wea garem need for kasem olketa gud samting from God, Datwan wea givim comfort.