Datfala Important Day for Rememberim

HEM day wea barava changem gogo bilong olketa man mekem olketa man kasem hope for laef olowe. No eni nara day long history hem important tumas for future bilong olketa man. Hem nao day wea Jesus finisim evri samting wea hem kam long earth for duim. Taem hem long torture-stake, hem tekem lastfala breath and singaot olsem: “Hem fulfill nao!” (John 19:30) Wanem nao purpose bilong Jesus for kam long earth?

Bible hem sei: “Son bilong man hem kam, no for olketa servem hem, bat for serve and for givim soul bilong hem olsem ransom for baem bak planti pipol.” (Matthew 20:28) Jesus givim soul, or laef bilong hem, mekem evri man savve sev from sin and dae wea olketa born witim. Tru nao, “God lovem world tumas dastawe hem givim only-born Son bilong hem, mekem evriwan wea showimaot faith long hem no need for dae bat kasem laef olowe.” (John 3:16) Sakrifaes bilong Jesus hem nambawan samting!

Day wea Jesus dae hem wanfala important day for rememberim for nara reason tu. Long datfala day Son bilong God teachim olketa disaepol bilong hem olketa important leson wea bae helpem olketa for stap faithful. Olketa last toktok bilong hem mas barava muvim heart bilong olketa disaepol hia! Wanem nao olketa teaching bilong hem? Hao nao iumi savve kasem gud samting from wanem Jesus teachim olketa? Next article bae ansarem olketa kwestin hia.