Kwestin From Reader

Waswe, fitim for mekem eni arrangement sapos wanfala anointed Christian wea sik hem kanduit attendim celebration bilong Evening Kaikai Bilong Lord long kongregeson?

Yes. Hem barava fitim and important for tingim and mekem arrangement for wanfala anointed Christian wea sik and leidaon long bed olowe and wea no fit for kam taem kongregeson celebratem Memorial bilong dae bilong Christ. Body of elders savve arrange for wanfala elder or nara mature Christian brata for tekem samfala part long datfala bred and wine for datfala anointed wan long sem naet bilong Memorial bifor sun kamap.

Maet datfala elder or nara brata wea duim visit savve story lelebet and readim samfala scripture wea fitim. Hem savve followim example wea Jesus showimaot taem Hem startim Evening Kaikai Bilong Lord. Olsem example, maet hem readim Matthew 26:26 or narafala scripture and bihaen hem offerim prea hem savve givim datfala bred wea no garem yeast. Bihaen datwan, hem savve readim Matthew chapter 26, verse 27 and 28, and givim datfala wine bihaen narafala prea. Hem savve talem lelebet toktok abaotem mining bilong bred and wine, and then bae hem fitim for offerim lastfala prea.

Iumi shud duim evri samting wea iumi fit for duim for stap long Evening Kaikai Bilong Lord long taem wea kongregeson celebratem. Bat wanem nao maet happen sapos no eni wei stap nao for wanfala anointed Christian from hem sik tumas, or stap long hospital or nara samting stopem hem for attendim Memorial bihaen sun go daon long Nisan 14? Anointed wan olsem savve followim example insaed long law bilong Moses and hem savve celebratem Memorial seleva bihaen 30 day.​—⁠Numbers 9:​9-​14.