Hao Important Nao Loving-Kaeness?
BIBLE sei: “Samting wea luk naes tumas long man bilong earth nao loving-kaeness bilong hem.” (Proverbs 19:22) Tru nao, olketa kaenfala fasin wea man showimaot from love nao muvim hem barava naes tumas. Long Bible, disfala word “loving-kaeness” hem minim kaenfala fasin wea stap finis midolwan olketa wea fren, and diswan kamap from narawan showimaot kaenfala fasin firstaem. Dastawe, insaed diswan hem loyal fasin.
King Jehoash bilong Judah fail for mekem grow disfala fasin wea naes tumas. Hem garem bigfala kaon for showim wei for tinghae and thankiu long aunty and uncle bilong hem, Jehoiada. Taem Jehoash hem no wan year yet, wicked granmami bilong hem mekem hemseleva kamap queen and killim dae evri brata bilong Jehoash, from olketa bae kamap king. Bat, hem fail for killim dae smol Jehoash, bikos aunty and uncle bilong hem haedem hem long careful wei. Tufala teachim hem tu Law bilong God. Taem Jehoash seven year, uncle bilong hem iusim paoa wea hem garem olsem hae priest for killim dae wicked queen and mekem Jehoash king.—2 Chronicles 22:10–23:15.
Young Jehoash rul olsem king long gudfala wei go kasem taem uncle bilong hem dae, then hem start for worshipim idol. God sendem Zechariah, son bilong Jehoiada, for warnim hem abaotem wei bilong hem for apostate. Jehoash komandim olketa man for sutim dae Zechariah witim ston. Diswan hem barava nogud samting wea nating showimaot loyal fasin long famili wea sevem hem taem hem smol!—2 Chronicles 24:17-21.
Bible sei: “Jehoash datfala king nating rememberim loving-kaeness wea dadi bilong [Zechariah] showim long hem, so hem killim dae son bilong hem.” Taem hem klosap for dae, Zechariah sei: “Letem Jehovah lukluk long diswan and askem bak.” Olketa toktok wea Zechariah talem hem tru evribit, Jehoash kamap sik fogud and olketa servant bilong hemseleva killim hem dae.—2 Chronicles 24:17-25.
Winim wei for kamap olsem King Jehoash, evriwan wea followim advaes hia bae garem nambawan future: “Letem loving-kaeness and trufala fasin no go aot from iu. . . . And sapos olsem bae iu stap gud . . . front long God and long man tu.”—Proverbs 3:3, 4.