“Keepim Gudfala Conscience”
PLANTI pipol tingse conscience bilong olketa mas gardim olketa taem olketa mekem disison. Bat for conscience kamap wanfala gard wea iumi fit for trustim, hem need for kasem stretfala training for savve long wanem nao hem stret and rong, and iumi mas minim wei wea hem leadim iumi.
Tingim experience bilong wanfala man wea nem bilong hem Zacchaeus, wea olketa recordim insaed Bible. Zacchaeus, wea stap long Jericho, hem wanfala bigman for kolektem tax and hem wanfala rich man. Olsem hemseleva talemaot, hem kamap rich thru long wei for laea for tekem selen—wanfala wei wea spoelem nara pipol. Waswe, conscience bilong Zacchaeus mekem hem feel guilty from hem duim samting wea no stret? Sapos olsem, hem nating followim.—Luke 19:1-7.
Bat wanfala samting happen wea mekem Zacchaeus for tingting gud moa long wei bilong hem. Jesus kasem Jericho. Disfala shortfala man, Zacchaeus, want for lukim Jesus, bat hem hard for lukim hem bikos staka pipol tumas. So hem ran go long wanfala tree wea stap long front and klaemap mekem hem savve lukim gud Jesus. From hem tinghae long wei wea Zacchaeus interest tumas, Jesus talem hem hao hem bae visitim hem long haos bilong hem. Zacchaeus hapi for welkamim man hia wea pipol tinghae long hem.
Samting wea Zacchaeus lukim and herem taem Jesus stap witim hem tasim heart bilong hem and muvim hem for changem wei bilong hem. Hem sei: “Lukim! Haf long evri samting bilong mi, Lord, bae mi givim long poor pipol, and eni samting wea mi giaman and tekem from eniwan bae mi givim bak fofala taem moa big.”—Luke 19:8.
Conscience bilong Zacchaeus kasem gudfala instruction, and hem lisin long conscience and duim samting wea fitim. Planti gud samting nao kamaot from diswan. Tingim feeling bilong Zacchaeus taem Jesus tok olsem long hem: “Tuday salvation hem kasem disfala haos!”—Luke 19:9.
Hem wanfala example wea barava encouragem iumi! Hem showim hao nomata wanem samting nao iumi aftarem bifor, iumi savve change. Olsem Zacchaeus, iumi savve followim toktok bilong Jesus—wea stap insaed Bible—and mekem grow savve for wanem hem stret and rong. Then, olsem aposol Peter encouragem, iumi savve, “keepim gudfala conscience.” Iumi savve lisin long conscience bilong iumi wea kasem training and duim stretfala samting.—1 Peter 3:16.