Barava Interesting Record Buk

EXPLORER Richard E. Byrd hem go long Antarctic faevfala taem from 1928 go kasem 1956. Wei wea hem raetem evriting wea happen insaed wanfala buk and keepim wanfala record bilong gogo bilong hem, hem helpem hem and team bilong hem for luksavve long wea wind blow kam from hem, for redyim olketa map, and kasem planti information abaotem datfala land bilong Antarctica.

Olketa gogo bilong Byrd barava showimaot wei wea hem important for garem record buk. Insaed wanfala record buk, man savve raetem evri samting wea happen long wanfala gogo. Bihaen, olketa savve iusim disfala information for lukluk moa long olketa samting wea happen long datfala gogo or iusim information hia for helpem olketa long narafala gogo.

Bible provaedem wanfala barava interesting record abaotem Flood long taem bilong Noah. Datfala Flood wea kasem full world hem go ahed for winim wan year. For redy for datfala Flood, Noah, waef bilong hem, and thrifala son and olketa waef bilong olketa waka for 50 or 60 year for buildim ark—bigfala ship wea size bilong hem 40,000 cubic meter. Diswan for wanem? For keepim samfala man and animal for laef thru long datfala Flood.—Genesis 7:1-3.

Datfala Bible buk bilong Genesis hem olsem wanfala record buk wea storyim evriting wea happen insaed gogo bilong Noah from start bilong Flood go kasem taem hem and famili bilong hem kamaot from ark. Waswe, diswan garem eni important mining for iumi distaem?